PROJECT KAL LAI PAWH PEN TUM HI SAWRKAR TIHMUALPHO TUMNA A NI

Get real time updates directly on you device, subscribe now.

National Highway No. 6 sial meka harsatna awm chungchangah Champhaia Tlawmngai Pawl hrang hrang thukhawm chuan, Project kal lai khaw pahnih khatin an tihbuai a, an pawh pen theih chuan, hun lokal zel turah sulhnu tha lo deuh hnutchhiah a ni dawn tih sawiin, an hmalaknain awmzia a neih loh chuan Champhai District mipui te’n Non Co-operation Movement an kalpui dawn tih an sawi.
National Highway No. 6, Seling leh Champhai inkar kawngpui sial mekah ruahmanna awmsa duh lova, Kawlkulh leh Dulte khawtlangin hna thawk thei lova hnathawktute an siam chungchangah, nimin khan Champhaia tlawmngai Pawl hrang hrang hruaitute chu YMA Sub-Hqrs Office, Champhaiah an thukhawm a.
Project kal lai khaw pahnih khatin an tihbuaia an pawh pen theih chuan, hun lokal leh zel turah sulhnu tha lo deuh hnutchhiah a ni dawn tih an sawi a. Khaw pahnih khatin an duh dana ruahmanna awmsa an tidanglam a nih chuan Sawrkar tan pawh hmingchhiatna nasa tak a ni dawn, an ti.
Nimina thukhawm hian NH No. 6 hi ram pahnih insumdawn tawnna kawng tura ruahman a nih avangin, khaw pahnih khat lek duh dana pawh pen chi niin an ngai lo tih an sawi a. Kawngpui sial dan tura mithiam te’n an lo ruahman ang ngeia sial tlang a nih theihna turin hma an la zel dawn tih an sawi bawk.
He kawngpui hi hun tiam chhung ngeia laihzawh an duh tih sawiin, kawng sial hna thawktute lakah mi thenkhatin harsatna an siam chu pawi an tih thu an sawi a. Hnathawktu te’n a nihna ang taka hna an thawh theihna turin venhimna pe tura sawrkar an phut tih an tarlang bawk.
Nimina thukhawm hian kawngpui sial meka harsatna awm chungchangah Sawrkarin an thu ngaichang tura a ngenna zawma hmalakna an neih zui loh laia harsatna a awm leh tak avangin sawrkar thuneitute dawr ni se, an ti a. Hnathawktu te’n harsatna an tawk zui leh a nih chuan Law Court-ah PIL
file an tum tih sawiin, hnathawktute laka Dulte khua in harsatna an siam zui zel a nih chuan zangnadawmna an lak tawh zawng zawng hnuh let vek a nih theihna turin hmalak ni se, an ti bawk.
Champhaia tlawmngai pawl hrang hrang thukhawm chuan heng an hmalakna hian awmzia a nei lo a nih chuan Champhai District mipui te’n Non Co-operation Movement an kalpui dawn tih an sawi bawk.

Note : Thlalak a a sen hi kawng hlui niin a hring leh a pawl a in rin ni kawng thar tur a ni e.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More