YMA Sub Hqrs Champhai venhimna hnuaiah Myanmar atanga raltlan Mizorama rawn lut mi 300 chuang Myanmar lamah an let leh tawh.
SYMA Champhai President F.Lalrinmuana chuan, Mizorama sahimna zawnga rawn tlanchhia Zohnahthlak unau Myanmar rama let leh duhte’n him taka ramri an kan hi YMA in a duh avanga venhimna hnuaia kir tir an nih
thu a sawi a. Hetihlai hian raltlan thawnkirtute zingah Myanmar atanga ruihhlo phur let thin an awm tih hriat a nih avang leh, hri thehdarhna kawnga fimkhur thilah raltlan an ram lama let lehte lo dawngsawngtute’n ramri an rawn kan lohna turin venhim hna an thawk tih a sawi bawk.
SYMA Champhai chuan hripui thawh hnihna leng mek avanga venhim hna thawh kawngah mahni duhthu a chet vel a rem lo tih sawiin,
khaw hrang hrangte hri laka an him zel theihna turin June ni 10 hian raltlan let leh duhte tan ruahmanna an siam a. Myanmar lama let leh duhte chuan mahni awmna VLTF te hriatpuina ngeiin let leh se an duh tih a sawi bawk.
Raltlan let leh tur Champhai paltlang turte chu chawl khawmuang lo va, ramri pan nghal turin an ngen a. Zokhawthar paltlanga let phal a nih loh thu sawiin, Zing dar 7:00 leh Tlai dar 4:00 inkarah Champhai Police Check Gate-a in-report turin an hriattir a. Police Check Gate atang hian SYMA Champhai venhimna hnuaiah ramri thlengin thlah an ni dawn a ni.
Comments are closed.