RALTLAN RAWN LUH BELH ZEL

0

Get real time updates directly on you device, subscribe now.

Myanmar Sipai leh anmahni dotute an inkah avangin Civil mi sa himna zawnga tlanchhia Mizoramah an luh belh zel.
Tuipuiral Group YMA Secretary sawi danin, Vaphaiah mi 119, Khankawnah 61, Farkawnah 49, Thekte-ah 40, Thekpuiah 26, Khawbungah 22, Dungtlangah 10, Zawngtetui leh Zawlseiah mi 4 ve ve bakah Sazep-ah mi 2 an lut tawh a. Nimin khan Vaphai khuaah raltlan 40 hruai luh leh tuma hmalak mek a ni bawk.
Tuipuiral Group YMA President MC Lalramenga sawi danin tun hnaia raltlan lo lut thar lehte hi an vaiin 388 an ni a, a lo awmsa 1431 te nen 1819 an tling chho ta a. Raltlan lo lut tharte khung hranna tur hmun leh an awm zuina tur ruahman kawngah YMA hruaitu ten harsatna an tawk chho mek niin thu dawn a ni.
East Tuipui Bialtu MLA Ramthanmawia, Bamboo Link Road Vice Chairman ni bawk chuan a bial chhunga raltlante dahna tur hmun sakna turin Tuipuiral Group YMA hnenah Silpauline Bundle 22 a pe a.
Raltlante hi Mizoram an rawn luh hian lo khung hran nghal zel an ni a. Covid 19 an kai leh kai loh endik zel a tul avangin test kit thahnem tak thawn luh thuai a ni dawn tih MLA Ramthanmawia chuan a sawi.
Pathianni-a Chin Land Defence Force, Thantlang thuchhuah a tarlan danin Thantlang Township-a, Lungler SAC (State Administration Council) Sipai Camp hi CNA/CDF Thantlang (Mipui Sipai) 200 chuangin an bei a, Myanmar Sipai lamin indo thlawhna nen an beih tak avangin an chawlhsan lailawk a. Inrinni zan Myanmar Sana-a Dar 7:45 velah mi 400 rualin Sipai Camp hi bei chhunzawm lehin zan dar 9:30 velah Sipai Camp hi an la fel thei ta a ni. He inbeihnaah hian CDF thuchhuahin a tarlan danin Sipai 12 an thi a, Mipui Sipai lam erawh thi an awm lo va, hliam tuar mi 8 an awm thung. Sipai Camp CDF ten an lak zawh hnu hian ralthuam eng emaw zat manin Camp hi an hal chhe nghal a ni.
Pathianni tlai lam thleng khan Sangau ah hian Raltlan 477 an awm tawh a. Nimin tlai lam thleng khan Pangkhua-ah raltlan 120 an awm mek a, South Lungpherah 59 awmin, Siachangkawnah 22 an awm mek bawk. Nimin lama rawn luh belhte hi Siaha, Lawngtlai leh khaw dang pan turte an ni.
Thingsai-a Village Council kaihhruaina-a Raltlan Relief & Management Committee din chuan, Lungler Sipai Camp beih hma leh beih hnua Thingsai ramchhunga raltlan lo lut tawh zawng zawng chu 723 an tlin tawh thu an sawi a. Kumin kumtira Myanmar rambuai thut avang khan Thingsaiah a khat tawkin raltlan hi an lo lut reng a. Tun dinhmunah khawtlang mipuiin Raltlan Camp-ah In 10 an sa fel tawh a, sak belh leh tum a ni a.
Tiau kama Border Haat tura ruahman Bazar shed buiding 3 awmsa, Raltlan Camp 2 atana hman mek kiangah buk dang sak belh tura ruahman mek a ni bawk.
Pathianni-a raltlan rawn lut mi 255 te chu Tiau kam Bungkhaw kai, Thingsai rama Border Haat tur Bazar Shed saksa 3 ah leh, Silpauline hmanga sak chawpah an awm mek a. Anni bakah hian lo luh belh tur eng emaw zat an la awm tih raltlante hian an sawi.

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More