East Tuipui Bialtu MLA, Ramthanmawia’n New Hruaikawn khawtlang mamawh hrang hrang a pe.
Nimin khan East Tuipui bialtu MLA Ramthanmawia, Bamboo Link Road Board Vice Chairman chuan a bial chhung New Hruaikawn khuaah, Covid hri kai mi 31 hmuhchhuah an nih avangin khawtlang mamawh Buhfai, Alu, Dal, Tel, Chi, Purunsen, Face Mask, Sanitizer leh pawisa fai Rs 20,000/- a pe a. New Hruaikawn khua hi in 50 niin mihring 250 an cheng a. Champhai CMO kaihhruai in Thawhtanni khan Medical team-te’n a hmunah kal chilhin hri kai endik a ni a. Mi 205 endik zingah 31 in hri an kai
tih hriat chhuah a ni. An zing a mi 14 hi kum 10 hnuai lam niin, Kum 10 – 18 inkar mi 7 an awm bawk. Heng hri kai hmuhchhuah te hi 4C leh In lamaa enkawl mek an ni.
Hetiang hi New Hruaikawn khaw boruak a nih avangin ei leh bar bakah Covid hri kai te enkawlna damdawi chungchangah te harsatna an tawh loh nan, Bialtu MLA hian pawisa fai leh an mamawh hrang hrang te hi rang takin a ngaihtuah sak nghal a. East Tuipui bialtu MLA chuan New Hruaikawn khawtlangin hetiang boruak an tawk hi pawi a ti tak zet tih sawiin, hripui a darh zui zel lohna turin Champhai CMO leh Medical team te nen tang hoin theihtawp an chhuah tur thu a sawi.
New Hruaikawn mipui leh khawtlang hruaitute chu lo thlaphang mai lo tur leh, harsatna leh mamawh an neih te inthlahrung lova a hnena sawi zel tura chah in, hri veite pawh an dam leh thuai theih nan duhsakna a hlan nghal bawk.
Comments are closed.