RAM DANGA HNATHAWK TURTE HNENAH POLICE NGENNA

Get real time updates directly on you device, subscribe now.

Mizoram Police chuan July ni 21, 2022 khan ram pawna hnathawh tum mipuite hnenah ngenna thu a hnuai a mi ang hian a chhuah:
Agency thenkhat ten ram danga hlawh tha tak neia zin/hnathawk turin mi thenkhatte an thlem thin a ni tih eng hun emaw atang khan hriat a ni a. Nimahsela an hnathawhna tur an va thlenin Agency thenkhat chuan an passport te leh an lehkha pawimawh te lo hren sakin engtikawng zawng pawha an duh danin hna an thawh luih tir a, chutianga hna an thawh that duh lova an rama kir leh an duh pawhin pawisa tam tak chawi turin an ti a, chutiang pawisa tam tham tak pek tur an neih loh chuan an rama haw let leh an phalsak lo bawk a ni. Lehkha tul ang ang tifel hmasa lova ram danga zin/hnathawh hi dan kalh a niin dan bawhchhiatna nasa tak a ni a, hei hian mahni rama inthawnkir leh chungchangah pawh harsatna nasa tak a thlen bawk a ni. Hetianga dan bawhchhetute hi mahni ram an thlen leh pawhin hetiang lama thuneituten dan tlawhchhanin thubuai an la siam sak zui zel a ni.
Chuvangin, bumna hmanga hnathawh tur kawhhmuh tute avang hian mihring hralhna hial a thleng thei tih hriain an thangkama awk lo tur leh an lakah fimkhur turin Mizoram Police chuan mipui te a ngen nawn leh tak meuh meuh a ni. Ram danga hna zawng emaw, thawk tur emaw reng reng chuan engkim dan ang thlapa tifela lehkha pawimawh zawng zawng nei ngei turin Mizoram Police chuan a ngen tak meuh meuh a, heng bakah pawh hian chutianga midang pui thintu, mi mal emaw, agency emaw te chanchin chu hriatchian hmasak thin tur a ni. Puih ngaia kan awm chuan englai pawhin Police a biak pawh theih reng a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More