SIRD&PR, WSSO leh PHE Department-te tangkawp bul tumin nimin khan I&PR Auditorium leh Conference Hall, Champhaiah-te Jal Jeevan Mission kal tlangin Cement Mistiri (Mason) leh tui pipe vuah leh a chhe siam lama tui mi (Plumber)-te pualin a thlawna inzirtirna hun buatsaih a ni a. He hun hi District Bawrhsap, Pi Maria C.T. Zuali, Chairman, Jal Jeevan Mission, Champhai District chuan khuallian niin a hmanpuiin he hun hi a hawng nghal.
Pi Maria C.T. Zuali chuan, Mason leh Plumber lama tuimi kal khawmte chu hna tha, mawi leh tlo siam thei tura tan la turin a fuih a. Hnam dangte pawh ruai ngai lovin kan tih ve theih naah te theihtawp chhuaha intodelh kan tum a ngai a ni, a ti a. Kalkhawmte chu ram hmangaihna leh intodelh duhna thinlung pu tur leh mahni pianpui thiamnate tipunga, midangte zirtir chhawngtu leh hna siamsaktu ni thei turin a chah bawk. Bawrhsap chuan, Hmanhmawh luat avanga hna chhe thinte a ngaimawh thu sawiin, zir tura kalkhawmte chu mi viak tha leh hna uluk mi nih tum turin a chah a. An lakah beiseina sang tak a neih thu hrilhin, pawl anga inzawmkhawm thiam tur leh mamawh dan ang zela kalho thiam turin a fuih a. Zirna tha leh hlawkthlak tak hmang a, a taka chawr tangkaitu nih tum tura duhsakna hlan chungin he inzirtirna hun hi a hawng a ni.
He hunah hian Pu Vanlalmuanawma SDO, PHED Champhai hnena atangin Jal Jeevan Mission (JJM) nih phung tlangpui ngaihthlak a ni a. He hun kaihruaitu Pu C. Lalthlansanga, Core Faculty, SIRD&PR, Course Director ni bawk chuan, JJM Project hmanga hnathawh tur za zela 5 chu a khaw neitu mipuite tum tur a nih avangin mipuite thlawp ṭhatna apiangah JJM Scheme a hlawhtlin theih tur thu a sawi a, khaw mipuite tawiawmna a ngen nghal bawk.
Inzirtirna hi thuang hniha kalpui tur a ni a. Mason-te hi Pu Zomawia Hauhnar, Faculty, SIRD&PR in zirtirna a pe a. Plumber-te hi Pu C. Lalthlansanga, Core Faculty, SIRD & PR, Course Director ni bawk chuan zirtirna pe thungin, chawhnu lamah a taka tih chhin nghal niin, inzirtirna chhimtute hi Certificate hlan nghal vek an ni.
Nimina inzirtirna hunah hian Champhai District-a thingtlang khaw 35 thlanchhuah atangin Mason 26 leh Plumber 42, an vaiin mi 68 an tel thei a. Inzirtirna hi vawiin hian nimina koh tel loh khaw dang zawngte tan kalpui chhunzawm leh a ni ang.
Comments are closed.