Nimin khan Tuipuiral Group YMA rorel inkhawm vawi 4-na, Leithum Community Hall-a neih chu Champhai Bawrhsap James Lalrinchhana’n khuallian niin a hmanpui a.
Champhai District Bawrhsap James Lalrinchhana chuan thu sawiin kil tin leh hmun tinah kan ram hi kawng hrang hrangin humhalh a ngai a, kan ram leh hnam humhalh tur hian sum leh pai leh hausakna a pawimawih ber lo va. Dikna, rinawmna, huaisenna leh hmangaihna hmangin ram leh hnam hi kan humhalh thei, a ti.
Kan ram leh hnam humhalh turin YMA hian a thawh hlawk thei ber a ni tiin YMA kumpuan, Ram leh hnam humhalh a hawnnaah he thu hi a sawi. Kan hnam ziarang, tlawmngaihna, aia upa zahthiamna leh kan hnam nun zemawi tam tak te humhalh tura hmalak a tul tak zet tawh tih sawiin, kan ram thing leh mau leh nungchate humhalh a ngai a ni, a ti a. Ram leilung chung lang lei tha luangral tur venna atan thingtlang loneitu ten changkham uar theuh turin a sawm bawk. Tuipuiral huam
chhunga hmasawnna hnathawh kal lai mekte tarlangin, Sorkar tawiawmtu tha ni theuh tura YMA Member te chu sawmin, Group YMA huapa inelna hrang hranga lawmman te a sem bawk a ni.
YMA Sub-Hqrs Champhai President F.Lalrinmuana chuan, kan ramin a mamawh ang zelin YMA te hi Pathianin Kum puan min pe thin tih a sawi a. Ramri pela min run mektu ruihhlo chi hrang hrang a taka do rawn a tul thu sawiin, kan ngaihsan zawng kan thlak a hun a, awlsam taka sum leh pai lakluh duhna te kalsanin, Mizo nun zemawi chhawm nung a, aia upate zahthiamin ram leh hnam humhim turin YMA thuthlungte vawng nung zelin, ram humhalh tura kan tanrual a hun tawh, a ti.
MC Lalramenga, Group President kaihhruaina hnuaiah rorel inkhawm neiin, rorel tura Agenda lut zinga YMA khawih thilhah, Sawrkar Phal loh thilah YMA member-te inhnamhnawih lo tura inzirtir ni rawh se tih te; Tuipuiral Group YMA huam chhunga PHC-ah Staff Nurse indaih lohna hnawhkhah a nih theih nan Group YMA in hma lak ni rawh se tih te; Tui lak hnara tui hna a pun theih nan PHE Dept, EF&CC Dept nena tangkawpin Group YMA in hma la rawh se tih leh, Group huam chhunga sava leh ramsa humhalh a nih theih nan sawrkar nena tangkawpin hma lak ni rawh se tih te pass a ni.
Sawrkar khawih zingah Tuipuiral huam chhunga zirtirtu indaih lohna leh headmaster post ruak hnawhkhah a nih theihna tura hmalak te; Mizo hnuchhamte hnam dangin fa atana an lak loh nan YMA in hma la rawh se tih te; Zawlsei to East Lungdar inkar kawng lai tlang tura hma lak te; Lianpui to Vaphai via Vangchhia kawng laih tura ruahman chak taka hmalak a nih theihna tura hma lak te leh Tuipuiral huam chhunga JNV/Kendrya Vidhyalaya/Eklavia a awm theihna tura hmalak te an rel bawk.
Tuipuiral group YMA huam chhungah hian khaw 21 awmin branch YMA 23 an awm a, member mipa 6667 leh hmeichhia 5398, an vaiin member 12,065 an awm a; life member 202 an awm mek.
Nimin inkhawmah hian kum khat chhunga member boral 101, mipa 66 leh hmeichhia 35 te sunna hun hman a ni.
Comments are closed.