RAM TANA NUNNA HLANTUTE HRIATRENGNA LUNGPHUN HAWNG

Indona avanga ram leh hnam tana nun hlantute hriatrengna leh zahna lantirna lungphun  War Memorial Champhai DC hmunhluia siam cheithat chu nimin zing khan District Bawrhsap Pi Maria C.T Zuali Chairman, District Zila Sainik Board, Champhai chuan a hawng.
Sub Major Lalparmawia, President, Mizoram Ex-Service League, Sub-Hqrs Champhai, kaihhruaiah hian Maria CT Zuali, DC, Champhai chuan thu sawiin ram leh hnam tana nun hlantute hriatrengna leh zahna lantirna hmun, War Memorial cheithat mawi leh zahawm tak hawn theiha peihfel a ni ta chu lawmawm a tih thu sawiin, ram leh hnam chhana venghim thintu sipaite chu sawrkarin a ngaipawimawh em em a ni, a ti a.
Indona avanga nunna chante kan ngaihluin an inpekna hlu tak chu kan theihnghilh tawh ngai dawn lo a ni, a ti bawk.
International boundary depa awm Champhai District-ah dan lova sumdawnna, ruihhlo tawlh leh thil thalo dangte a awm thinavangin Ex-Servicemen-te chu an hna atangin chawl tawh mah se khawtlang leh District siamthat kawngah an rilru leh ngaihtuahna seng a, theihtawp chhuahpui turin a sawm a; an finchhuahna leh tawiawmna a ngen nghal bawk a ni.
Martar-te zahna chibai bukna neih a nih hnuah Deputy Commissioner Pi Maria C.T Zuali, Addl. District & Sessions Judge Pi Sylvie Z.Ralte,  District Sainik Welfare & Resettlement Officer Maj John V.L Khawlhring, 8 Assam Rifles Champhai Commandant Maj. Sunny Tomar leh DIPRO Dr. Lallawmkima ten War Memorial-ah zahna pangpar an dah a ni.

War Memorial hi kum 1997 khan tuna DC hmun hluiah hian siam a ni a. DC Office leh District Sainik Welfare & Resettlement Office hmalaknain Rs. 1,50,000/- (cheng nuaikhat leh singnga) sengin thla hmasa October kartawp  khan siama cheithat a ni a. War Memorial lungphunah hian indopui pakhatna leh pahnihna bakah India ramin zalenna a neih hnu indona hrang hranga ram leh hnam tana nunna hlu tak hlantu sipai 17 te hming a chuang a, remchang hmasa berah 1 ziah belh leh tura ruahman a ni.