RAN VULHTUTE LEH LONEITUTE TANA BANK THENKHAT IN HMA AN LA

Champhai District Consultative Committee (DCC)/ District Level Review Committee (DLRC) chu nimin chawhma khan Chairman Maria CT Zuali, Champhai DC hovin DC Conference Hall-ah an thukhawm a. National Bank for Agriculture and Rural Development (NABARD), Champhai buatsaih Potential Linked Credit Plan 2022-2023 chu Bawrhsap hian a tlangzarh nghal.
Bawrhsap Maria CT Zuali chuan, loneitu leh ran vulhtute hamthatna ngaihvena Bank thenkhat ten hma an la chu lawmawm a tih thu sawiin, kuthnathawktu leh loneitute chawikang tura theihtawp chhuah zel turin a fuih a. Line Department hrang hranga thawkte chu Bank leh loneitute inkara palai hna thawka suihzawmtu nih tum tur leh an hriat thiam loh awmte hrilhfiah a, inhawng taka hmalakpuitu nih tum fo turin a chah a. Bank a pawisa dahluh emaw, Bank in pawisa a dawn tam ang hua loan pek chhuak lama an inhawng tawk lo chu a vei thu sawiin, hamthatna dawng thei turte hrilhhriat loh avanga loan pek chhuah thalo awm theite chingfela, a tul anga bawhzui turin Bank-a thawkte leh Line Department hotute a chah a.
Mirethei leh chawikan ngaite chawikan lamah thahnem ngai taka thawk a, Financial Literacy Campaign tam zawk nei theuh turin Bank hrang hranga thawkte chu a chah a ni.
September 2021 quarter chhunga Champhai District-a Bank hrang hranga pawisa dahluh leh pekchhuah tam zawng inthlauhna khaikhinna, Credit Deposit Ratio/CD Ratio chawhrual chu 48.36 % a ni a, June 2021 quarter tawpa CD Ratio 43.14 % aiin 5.22 % in pung mah se, hei hian CD Ratio bituk zat 60 % chu a phak lo a. 2021-2022 Financial Year chhunga Annual Credit Plan (ACP) hnuaia hnathawhte thlirho a ni bawk a. Priority Sector atana target Rs. Nuai 13010.70 atangin Rs. Nuai 7073.23 (54.36 %) hu tihhlawhtlin a ni a. Non Priority Sector hnuaia target Rs. Nuai 1364 atangin Nuai 1846.79 (135.40 %) hu tihhlawhtlin tawh a ni. Pradhan Mantri Mudra Yojana (PMMY) kaltlangin Sishu hnuaiah mi 3, Kishore hnuaiah 67, Tarun hnuaiah 23, Stand up India hnuaiah 5, an vaiin mi 98 te hnenah loan Rs. Nuai 266.28 hu pek chhuah a ni tawh bawk.