RAMBUAI AVANGA RALTLAN MANGANGTE YMA IN MIZO TAKA ALO TUAMHLAWM THIN HI A ROPUI

Get real time updates directly on you device, subscribe now.

Border Area Development Programme (BADP) 2019-2020 sum cheng nuai sawmhnih leh panga (Rs.25 lakh) hmanga sak, Chawngtui East Community Hall chu nimin chawhma khan Rural Development Minister Pu Lalruatkima chuan a hawng. Hemi hnu hian Chawngtui East Branch YMA in  kum 75 na a tlin lawmna Platinum Jubilee (1946-2021) lungphun a hawng a, Platinum Jubilee lawmna  puala Community Hall thara program buatsaih chu Khuallian niin a telpui a, he hunah hian East Tuipui bialtu MLA Pu Ramthanmawia, Bamboo Link Road Board Vice Chairman chu Khualzahawm a ni.

Khuallian Pu Lalruatkima chuan Chawngtui East khawtlangin Community Hall tha tak a nei thar leh Branch YMA in a din atanga kum 75 na Platinum Jubilee hial a thleng thei chu a lawmpui thu a sawi a. Hnam tana nunna hlu tak chan leh ngaihtuahna sengtute lo chawrchhuahna Chawngtui East khua chu ngaihsanawm a tih thu sawiin, ram leh hnam tana theihtawp chhuahtute ngaihhlutna chang hriat a tul thu sawiin, an sulhnute a dai tawh dawn lo a ni, a ti a. YMA chu Pathianin Missionary-te kaltlanga Mizote min pek a nih thu leh din a nih atanga vawiin ni thlenga khawtlang siamthat leh enkawl kawnga pawimawh ber a nih thu sawiin, a thupui vawn tanpui ngaite tanpui tih chu thlahthlam hauh lova chhawmnung zel tur leh pachhiate leh rethei zawkte hlamchhiah mai lova an tana ding fo thin turin YMA member-te a chah a. Ram ngaw leh nungcha humhalh kawngah theihtawp chhuah zel a tul thu leh ram leh hnam humhalh tura tan mar reng a ngaih thu a sawi bawk a. Hnam dinchhuah nana pawimawh tak zirna kawnga hmasawn leh intodelh turin kumpuan thupui hrang hrangte neia hmalak a ni thin chu lawmawm tiin, a hlawhtlinnate hmuh mek zel a ni, a ti bawk.

Mizo mipate dam hun chhung rei lo lutuk leh birth rate tlem lutuk chu veiawm a tih thu sawiin, ruihhlo leh a kaihhnawih dangte bansan  ngam a, hriselna leh hnam anga dinchhuah theihna tura tulte dah pawimawh zawk a tul thu a sawi a. Khawvel ram changkang zel leh inelna nasa tak kara dingchhuak ve thei turin zirna kawnga tanlak deuh deuh a tul thu sawiin, zirnain tawp chin a nei lo a, mahni chhungkua, khawtlang leh hnam tana lehkha zir uar a ngai a ni, a ti a. Platinum Jubilee chuan khawtlangah inlungrualna leh thawhhona tha thlen se a duh thu sawiin, Community Hall tha tak chu tangkai taka hmanga, neitu thinlung pua enkawl chhunzawm zel turin a chah nghal a ni.

Khualzahawm Bamboo Link Road Board Vice Chairman Pu Ramthanmawia chuan Chawngtui East khuain Community Hall tha tak a nei thar chu a lawmpui thu sawiin, tangkai taka an hman a duhsak thu sawiin, khawtlang mamawhte a tul anga bawhzui zel tum a ni, a ti a. Khawchhak unau ram buai avanga harsatna tawk mek, sahimna zawnga raltlante YMA kaihhruaia hnuaia hmangaih taka  dawnsawn leh tuamhlawm an ni thin chu lawmawm a tih thu a sawi bawk.

Chawngtui East Branch YMA Platinum Jubilee lawmna hun hi  Pu Zoramchhuana, Chairman, Organising Committee chuan a kaihruai a. Platinum Jubilee lawmna puala Article ziak tha, Recitation leh Solo lawmmante sem a ni a. Pu F. Lalrinmuana, President, Sub-Headquarters YMA Champhai leh Pu Thangropuia, VCP Chawngtui East ten thu an sawi bawk.

Platinum Jubilee lawmna pual hian December ni 6, 2021 zan atang khan intihsiakna leh intihhlimna hrang hrangte huaihawt a ni a. Nizan khan Platinum Jubilee lawmna hun hman chu khar a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More