Ramngaw la awmte humhalhna kawngah thikthu tichhe dawn

Get real time updates directly on you device, subscribe now.

Ni 31.3.2021 (Nilaini) dar 11:00 am khan District Water & Sanitation Mission Chairman Maria CT Zuali, Champhai Bawrhsap hovin DC Conference Hall Keifangtlangah Champhai khawpui chhunga VC hrang hrangte leh SYMA Champhai hruaitute chuan Champhai tuilakna hnar tihfai dan tur chungchang an sawi ho.
Thukhawm chuan Champhai tuilak hnar hmun hnih tifaiin a thawh khatna atana hnatlan phawt ni se tiin an rel a. Champhai South A/C Joint VC te chu Champhai Dinthar Veng hnuai tifaiin an hnatlang ang a, Champhai North A/C Joint VC te chu Keilungliah tifaiin an hnatlang thung dawn a ni. Meeting chuan run thlak hnatlang (Phat theih loh) koh ni se tiin a rel a, mipui nawlpuiin Champhai tuilakna hnar bawlhhlawh zia mit ngeia an hmuh ve tha an tih thu an sawi a. Champhai zawl, Khawchhak Tuipuiah bawlhhlawh dang thei tur Check Dam siam ni se tih rel a ni bawk.
Maria CT Zuali, Clean, Beautiful & Healthy Champhai Committee, Chairman ni bawk chuan VC leh YMA hruaitu kalkhawmte chu Champhai khawpui fai leh thianghlim siam tur leh, Champhai tui tlan a thianghlim theihna tura theihtawp chhuah tura sawmin, Champhai hian hmangaihtu tak tak a la nei a ni tih kan lantir a ngai a ni, a ti a. Mipui nawlpuiin kan bawlhhlawh paihte hi khawiah nge a thang hre miah lova an paih thin tih sawiin, kan in leh a vela bawlhhlawhte midang tana a hnawk em tih ngaihtuah miah lova paih thinte avangin faina kawngah hma kan sawn thei lo, a ti.
Maria CT Zuali chuan Ram ngaw tih chereu avanga Champhaia tui lak chu a kiam telh telh tih sawiin, ramngaw humhalh kawngah theihtawp chhuaha tan lak thar a ngai tih a sawi a.
Champhai tuilakna hnar Khankawn leh Zotlang inkara ramngaw awm te
khauh taka humhalh a nih thu leh order chhuah tawh a nih thu tarlangin an thikthu a chhe hle dawn tih a sawi bawk.
Chaw tel lovin mihringte hi ni eng emawti chhung dam thei mah ila, tui tel lo chuan ni 3 aia rei kan dam thei lo tih sawiin, keimahni bakah kan ranvulh leh kan ei tur thlaite hi tui tel lova dam khawchhuak thei lo an nih avangin tui hi ngaihpawimawh hmasak bera kan neih a ngai a ni, a ti a. Bawhhlawh hal hi thil awlsam tak ni mah se, mihring hriselna khawih chhe thei boruak chhia a siam theih avangin a pumpelh dan kan zawn hram hram a ngai a ni, a ti bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More