Champhai District chhung hmun hrang hrangah Nungcha Humhalh Hapta denchhenin nungcha leh ramngaw humhalh leh venhim kawnga inzirtirna hun hman a nih hnuah, nimin khan Khawbung Forest Range chhung Bungzung Community Hall-ah Champhai District chhunga Nungcha Humhalh Hapta kharna hun hman a ni.
Champhai DFO Lalduhthlana chuan Bungzung khawtlang chu nungcha humhalh kawngah an thawk tha hle thin tih sawiin, hemi avang hian Wildlife Week kharna pawh Bungzungah ruahmanna siam an nih thu a sawi a. Ramsa humhalh tur chuan kah loh, thah loh, awh loh a pawimawh tih sawiin, thing leh mau, ramngaw humhalh tel a tul hle tih a sawi bawk. Ramsa humhalh tur chuan an chenna leh an ei tur kan humhalh tel loh chuan awmzia a nei dawn lo va, ramngaw humhalh that hian nungcha kan humhalh tel bakah boruak chhe zel tur kan venghim pah a ni, tiin kalkhawmte chu nungcha humhalh tur leh ramngaw humhalh a, chhuan lo kal zel tur tana Mizoram chu ram nuama siam turin a sawm a ni.
Hony. Wildlife Warden Lalhlupuia chuan ram leh khawtlang Dan zawm lova palzut thin ten hremna leh vanduaina an tawk thin nia a hriat thu sawiin, Mizoramah Sa pel, Sava veh leh Luia cheng nungcha tihlum thin, tihhlum tum leh ram vak thin thahnem takin vanduaina tawkin, an boral phah tawh nghe nghe a ni, a ti a,Nungchate leh an chenna ramngawte humhalhtu ni theuh turin kalkhawmte chu a sawm a ni.
Wildlife Week kharna hunah hian ASI C.Hmingthantluanga’n Ruihhlo hman sual pawi zia leh a that loh ziate a thlalak nen a sawifiah a. Zirlaite chu kan hnam hmelma, nun titawia, piansualna thlentu, Ruihhlo laka inthiarfihlim turin a sawm a. Ruihhlo thalo tawlhtu te zep lo tur te, a hlauhawm zia hriaa ti chhintu ni lo tur leh ruihhlo chu ti ve chhin lo hrim hrim turin mipui a sawm a ni.
Nungcha Humhalh Hapta puala hun hman hnuah hian Bungzung khuaa ramvak thinte chu DFO leh a thawhpuite chuan kawmin, inpawhtlang takin nungcha humhalhna kawnga hmalak dan turte an sawiho a ni.
Comments are closed.