Ramsa man te hal ral

Nimin chawhnu khan Environment, Forest & Climate Change Department, Champhai chuan tun hnaia Ramsa kah leh awh an mante an halral.
Ramsa kah leh awh an mante halralna hun hi DFO Office tualah hman niin, SP charge la mektu Addl.SP C.Lalengliana’n a halral a. Addl SP C.Lalengliana chuan, Mizoram mipui chu ramsa humhalh kawnga an thanharh a tul thu sawiin, tuna ramsa man halral a ni hian mipui sakap
thin te leh sava veh thin te hnenah ramsa leh sava te humhalh a tulzia hriattir se a duh tih a sawi a. Sakhi kap hlum tuin sa kap tawh lo tura
intiamkamna nena District EFCC Department-a a silai a tung ngam chu fakawm a tih thu sawiin, silai nei te pawhin kan ram a ramsa te thlamuang taka an awm theihna tura an silaite tung ngam tura a duh
thu a sawi bawk.
Nimin a sa halral te hi – Sakhi pum 1, kg 16-a rit, a pa tuai leh Vahrit 1, a patuai bakah, Zawng sarep khai 5, kg 2.500-a rit te a ni a. Sakhi hi
Champhai District Wildlife Crime Control Sub-Unit Joint Patrolling Duty-te chuan November ni 30 tlai khan Ruantlang khaw bul, Zonunsanga Farm bulah Lalrambuatsaiha, B.Lawmawma, Ruantlang fapa hnen atangin an man a. Sakhi kaptu hi WPA, 1972 hnuaiah
Cheng 25,000 chawitir niin, ramvak tawh lo tura intiamin a silai hi DFO Champhai hnenah a tung bawk. Hei bakah hian Vahrit kahhlum sa man hi
Ruantlang khaw daia ram kalte hnen atanga man niin, Vahrit kengtu hian a chhar nia a sawi avangin thubuai erawh siam sak a ni lo thung a, Sarep-te hi Myanmar atanga lak luh niin, a neitu hriat a ni lo.
Champhai EFCC Dept. leh Police tangkawpte chuan District SP kaihhruaiin Wildlife Crime Control Sub-Unit dinin, he Unit hian ramsa leh sava kap thin te vaiin an man thin a, dan angin an chungah action lak thin a ni a, mi thahnem tak te chu man an lo ni tawhin pawisa chawi tir an lo ni tawh thin a ni. Tun hnaiah ramsa kap leh awk te, ram vakte leh Dan lova thing zaite an dap ngawrh hle a.
Ramhnuai hmun hrang hrang fang leh duty-a chhuakin, ramsa thahna hmanrua – Silai chi hrang hrang, Thang, Generator leh Thing zaina hmanrua thahnem tak an man tawh a. Hetiang hmanrua an mansakte hi a reilo berah thla thum tal an hrensak ngei tur thu EFCC Deptt. Champhai-a an hotute chuan an sawi.