RIMAWI ZIRNA SYNOD A DAH TURIN THLEN DAWN

Mizoram hmun dang rualin Champhai North leh South Presbytery chu a tiak fel.
Presbytery hi Zirtawpni atang khan tan a ni a, Zirtawpni zing-ah Upa Candidate exam buatsaih niin Chawhma lamah Finance Committee leh Sub Pastoral Committee an thu a, chawhnu lamah Nomination Committee an thu bawk.
Champhai North Presbytery hi Vengthlang North Kohhran chuan an thleng a, Inrinni khan rorel inkhawma hun hman niin, Saron Branch Church kohhran puitlinga hlan kai rawtna chu pawm a ni a.
Kohhran Upa thlan dil kohhran 5 te chu remtih sak an ni a. Zirlaibu ziaktu thlalak nemkai rawtna leh Naupiang pun theih nana sawrkar hnathawk maternity leave pek belh rawtna chu synod-a kal zel tura pass a ni a. Kohhran Upa Ordination upat dan indawta tih ni rawh se tih chu pass a ni bawk.
Nimin chawhma khan Upa nemngheh inkhawm neih a ni a, Upa 5 an nemnghet a, chawhnuah Upa thi 2 te sun an ni bawk a. Upa pakhat chawimawina hlan an ni ang a, Moderator kal chhuak Rev. K. Lalchhuanawma hnen atangin Veledictory Sermon ngaihthlak a ni bawk.
Nakkum Champhai North Presbytery chu Vengthlang Kohhran-ah nghah a ni dawn a. Upa Daldothanga chu Moderator a ni ang a, Upa T. Lalhriatpuia chu Secretary Sr. a ni ang a, Upa K. Lalrintluanga chu Secretary Jr. a ni ang a, Upa P Khawlliana chu Finance Officer a ni ang a, Upa K Zarzoliana chu Statistician a ni ang.
Champhai South Presbytery chu Zotlang Kohhranah nghah niin, Inrinni rorel inkhawma thu rel zingah Pro Pastor lak hian, lak zat tur bithliah aia 5 a tam thlan chhuah a, chu ta tang chuan bithliah lak thin ni rawh se tih leh Music zirna, Keyboard, Tonic Solfa leh Staff notation zirna Champhai-ah Synod in hawng rawh se tih chu Synod-a kal zel turin pass a ni a. Kum 2020 leh 2021 Nilai leh Beihrual thupui bu-a Good Friday dawn zan inkhawm hming ‘Venpui zan’ tia tarlan hi ‘Zan ven inkhawm’ tiin tarlan thin ni rawh se tih chu SL&PB-ah thlen ni rawh se tiin an pass bawk a. Kohhran Upa thlan dil kohhran 4 leh Biak in sak that dil kohhran pakhat chu Presbytery hian a remtih sak bawk.
Nimin, Pathianni chawhma khan Upa
nemngheh inkhawm neih a ni a, Upa 6 nemngheh an ni a; chawhnuah Upa thi sun a ni a, Upa pakhat chawimawina hlan a ni a. Moderator kal chhuak hnen atangin Veledictory Sermon ngaihthlak a ni bawk.
Nakkum Champhai South Presbytery chu Vengsang-ah nghah a ni dawn a. Upa Lalchungnunga chu Moderator a ni ang a, Upa Zosanglura chu Secretary Sr. a ni ang a, Upa Rochhunga Ralte chu Secretary Jr. a ni ang a; Upa B Lalhmasawna chu Finance Officer a ni ang a, Upa Lalhmangaiha chu Statistician a ni ang.