RT-PCR DISTRICT HOSPITAL A DAH TUR NORTH & SOUTH MLA TEN LACHHUAK TA

UNICEF in ICMR kaltlanga Champhai District Hostpital-a dah tur RTPCR a pek chu nimin khan Champhai North leh South Bialtu MLA te’n Champhaia phurh chhoh turin an la chhuak fel.
Zawhna chhangin Champhai North Bialtu MLA Dr. ZR Thiamsanga, MOT Chairman chuan RTPCR khawl hi October ni 11-ah Champhai-ah phurh chhoh a nih tur thu a sawi a. RTPCR khawl bunna tur la peih fel ni lo mah se, a building structure leh drawing-te buaipui mek a nih thu sawiin, tuna Champhai District Hospital TrueNat Lab Building hi extend-in khawl hi dah tum a nih thu a sawi bawk.

Dr. ZR Thiamsanga chuan Champhai South Bialtu MLA TJ Lalnuntluanga nen Champhai tan theihtawp an chhuah thu sawiin, Champhai mipui te chu lo mangang lo turin a chah a, a rang thei ang bera RTPCR khawl bun a nih theihna turin chak taka hma lak mek a ni, a ti. MOT Chairman chuan Mizorama District tinah RTPCR khawl bun turin Cheif Minister leh Health Minister hmalaknain hmalak mek a nih thu sawiin, vawi khata tih nghal duak theih a nih loh avangin a tahtawla dah vek tum a nih thu a sawi bawk.