RUAH SUR AVANGIN IN 1 CHIM, IN RAUHSAN AWM BAWK

Get real time updates directly on you device, subscribe now.

Tunhnaia ruahsur nasa avangin nimin zing khan Ruantlang Mualveng, Champhaiah in a chim a, vanneihthlak takin thi leh hliam an awm lo.
In chim hi Lalchhuangkimi te luah lai mi 2 chenna in, Assam type a ni a; nimin zing dar 1:00 khan inhnuai lamah thawm an hriat avangin awm zui ngam lovin an riak chhuak a. Zing khaw varah thenawm khawveng in punkhawmin bungrua a theih ang ang an chuh a, bungraw pawimawh zual an chuh hnu zing dar 7:30 velah in hi a chim zui ta a ni.
Nimin khan Mualveng khawtlang chu chak seng hawiin an hnatlang a, Lalchhuangkimi te in lo luah lailawk tur hian Mualveng Community Hall hnuai an pin sak bawk a ni. Hnatlang thawk chhuakte thingpui lumna atan District Disaster Management & Rehabilitation chuan Rs. 1000 leh silpouline an pe a, YMA Sub-hqrs in Rs. 2000 leh silpouline an pe bawk a. Bialtu MLA TJ Lalnuntluanga chuan hnatlang thingpui lumna tur Rs. 5000 a pek bakah Ruantlang VC ten thingpui lumna tur an pe bawk.
Ruahsur nasa hian Champhai leh a chheh vel hmun hrang hrangah chhiatna a thlen nual a. District Organiser, DM&R hnen atanga thudawn danin nimin chawhnu lam thlenga report lut chinah In rauhsan 1, a min mai hlauhawm avanga silpouline-a khuh ngai 8 a awm tawh a. Hriat theih chinah Kanan veng,
Chhungte leh Mualkawi leh Dungtlangah te harsatna thlen khawpin lei a min bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More