RUIHHLO DO ZEL DAN TUR REL

YMA Sub Headquarters Champhai hnuaia Anti-Drug Squad te chuan nimin khan Excise & Narcotics Department nen an kal zel dan tur chungchang an sawiho.
He hun hi YMA Sub Hqrs. Office, Tlangrawt ah C. Lalventhuama, Chairman, SYMA Anti-Drug Squad kaihhruaiin hman a ni a. Excise & Narcotics Department Assistant Commissioner, Vanlalvura Ralte chuan, Department anga ruihhlo do kawnga hma an lo lak tawh dan a tarlang a. Champhaia a awm hnuah Ruihhlo man kawngah Mizoram Excise record an nei thei chu lawmawm a tih thu a sawi a. Chu record nei tura YMA te nen thawh hona tha tak an nei chu lawmawm a tih thu sawiin, sawrkar atanga hamthatna leh chawimawina dawng an lo awm a nih pawhin, SYMA te thawhrimna vang chauh a nih tur thu a sawi bawk.
Assistant Commissioner chuan Champhai District chhunga khaw hrang hrang leh zirna in hrang hrang bakah, Kohhran hrang hranga naupang leh thalaite hnenah ruihhlo hmansual that lohna leh a hlauhawm dan te zirtira, hun an hman tawh thu leh hmachhawp pawh an la neih mek thu a sawi a.
Naupang leh thalaite chu hun kal zel tura damdawi mamawh tu tur te an la nih avangin, damdawi tih
chhin nachang leh tihchhin chakna an neih hmaa a nasa thei ang bera damdawi hmansual that lohna
tlangaupui chu ram damna tura pawimawh tak a nih thu a sawi.
Assistant Commissioner chuan nu leh pa te pawh an fate helam kawnga an harh lohna tura tun atanga tan la turin a chah a. An fate damdawi hmansualna avanga an thih hnuah chauh an fate an enkawl that loh avanga inchhir lo turin a sawm a. A hun laia an fate enkawl tha tur leh ngaihsak turin a chah a. Champhai District ah ruihhlo ngawl vei 187 chhinchhiah an ni tawh tih a sawi a.
Mizoramah kum 1984 atanga kum 2022 chhungin mi 1706 te chu Damdawi hmansual vangin an thi tawh tih a sawi bawk. He hunah hian ruihhlo do kawnga hma an lak zel dan tur an sawiho a. District Court a thuhretu chanvo leh a pawimawh dan te, thuhretuin pawikhawihte Ukil a hmachhawn dan bakah thil kangphung leh nihna hrang hrang te sawiho a ni bawk.

Get real time updates directly on you device, subscribe now.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More