Addl District & Session Judge, Sylvie Zomuanpuii Ralte chuan nimin khan ruihhlo vanga man mi pathumte chu thiam loh chantir in, hrehawm taka kum 10 chuang tang tur leh Rs. 1,00,000 chawi turin a hrem.
Kum 2019 August ni 19 khan Addl SP CID (SB) kaihhruai CID (SB) staff-te, SDPO Champhai kaihhruai Champhai DEF Staff te leh 8th Assam Rifles te’n Zokhawthar leh Champhai inkar Hringtlangtlang pengah Malsawmdawngliana s/o Dintluanga, Bawngkawn Aizawl leh Lalthakima, s/o T.Chhuana, Khawzawl Vengthar te hnen atangin Heroin Hawng 30 (Gram 378.7-a rit) a hun laia tualchhung hralhnaa chhut a, Rs. Nuai 15 man vel a ni a.
Ruihhlo neitua puh mi pahnihte hi nimin khan Addl District & Session Judge, Sylvie Zomuanpuii Ralte chuan an chungthu relin, Kum 12 chhung hrehawm taka lung in tang tur leh Rs. Nuai 1 ve ve chawi turin a hrem a. Kum 2019 July ni 6-a CID (SB) Champhai leh Special Narcotics PS Aizawl tangdun chuan Imanuel-a Champhai Zotlang hnen atangin Heroin Hawng 20 (Gram 288.8) a hun laia tualchhung hralhnaa chhut a, Rs. Nuai 10 hu an man a.
Heroin neitua puh hi nimin khan Addl District & Session Judge, Sylvie Zomuanpuii Ralte chuan thiam loh chantirin kum 11 chhung hrehawm taka lung in tang tur leh Rs. Nuai 1 chawi turin a hrem bawk.
COVID-19 hripui leng vangin kumin chhung hian Court hawn mumal a ni lo a; Addl District & Sessions Judge, Champhai hian October-December 2021 thleng hian thubuai 31 chuang chingfelin, heng thubuai nei zawng zawngte hi thiamloh chantir (convict) vek an ni.
Comments are closed.