Tun hnaia rulin mi 21 zet a chukna leh rul chukna avanga mi 2 in nunna an channa khua Khuangthing khuaah Rul chuka inenkawl dan leh inven dan zir ho a ni.
Nilaini zan khan Khuangthing Community Hall-ah Rul chungchanga mithiam bik Romalsawma’n Khuangthing khaw mipuite a zirtir a. Mipui lam atanga zawhna rul chanchin leh rul chuk inenkawl dan tur te, rul tur hlauhawm leh hlauhawm lo hriat hran dan turte chu Romalsawma hian chhangin a hrilhfiah a ni.
Khuangthing khuaah hian kumin chhungin rul chuk mi 21 an awm tawh thu leh mi 2 in nunna an chan tawh tih Dr Lalhmingsanga chuan a sawi a. Khuangthing khuain rul chuk avanga harsatna an tawrh nasat em avang hian East Tuipui bialtu MLA Pu Ramthanmawia chuan Khuangthing khuaah hian rul man thin leh rul lama mithiam mi 2 a tir lut a. Ni 2 leh zan 2 an cham chhung hian khawchhung-ah rul 2 an man a, Chawngkawr ni ngeia hriat erawh chu Presbyterian Biak In lung rem thiah nasat a ngaih avangin an man thei lo thung a ni.
Rul avanga hun rei tak ralti taka an awm lai a Pu Ramthanmawia, Bialtu MLA in a bial mipuite thlamuan tura mithiam a tir lut leh Rul tur thahna Khawbung PHC-a a dah tir chu Khuangthing khawtlang chu an bialtu MLA chungah hian an lawm hle
Comments are closed.