RUL TE HI AN INTHIARFIHLIM THEIH NAN HUN LEH HMUN KAN SIAM SAK A NGAI

Get real time updates directly on you device, subscribe now.

Nimin chawhma dar 11:00 khan DC Pisa tual, Keifangtlang-ah Rulngan chungchanga hriat tulte inzirtirna mithiam ten an nei.
Bawrhsap James Lalrinchhana chuan environment humhalh tura a taka chetchhuah a tul thu sawiin, kan zavaiin eng emaw taka inmamawh tawn kan nih avangin lungrual taka khawsa tlang tur kan ni, a ti a. Hriatchian tawk loh avanga Rul hlauh leh intihthaih thin chu bansan a, thuneitute leh mithiam zawkte rawn chunga buaipui a tul tih a sawi bawk.
Zirtirna petu Romalsawma chuan, Rulngan chu Pathianin khawvela awm ve tura a siam, ecological balance siam nana pawimawh tak a nih thu sawiin, rul dang eiraltu an nih avangin rul dang pung chak lutuk tur an veng a, kan hlut thiam a ngai a ni, a ti a. Rul chungchanga ngaihdan dik tawk lo leh intihpalh changa hmalak dan tur inzirtirna tam zawk neih a tul thu pawh sawiin, rul chuan a hranpain mihringte a tibuai hran lo a, an inthiarfihlim theih nan hun leh hmun kan siam sak a ngai a ni, a ti bawk.
He hunah hian nungchate buaipui kawnga dan ang thlapa chetlak a tul thu leh, dan hnuaiah mumal taka thawh hona zahawm tak vawn nun zel a pawimawh thute tarlan a ni a. Rul chungchang zirbing mi leh man thiam bikte chuan, an hmalakna kawnga Champhai District thuneitu te, khawtlang hruaitu leh mipui tawiawmnaah lawmthu an sawi a ni. Rul chungchang zirbing mi leh man thiam Romalsawma leh a thiante pahnih – Lalrinsanga leh Vanlalhruaia, Aizawlte chuan Nilaini khan Khuangthing ram chhung, khaw chhung hnaia Rulngan no awp lai chu mipui ngenna angin hmun him zawka dah sawn turin an man a.
Ruahman dan chuan Dampa Wildlife Sanctuary-a chhuah tum a ni. Rualngan hi feet 8 a sei niin, tui 20 a awp a, bu vawi 2-3 vel chhep tawha ngaih a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More