Rulhut in a hawng thalo te zirtir pahin Rulhut hlo ei

0

Get real time updates directly on you device, subscribe now.

Naupang kum 1-19 inkarten rulhut an pai lohna tura rulhut hlo pek leh rulhutin a nghawng thalo inzirtirna beihpuithlak thawh khatna, Ramtuk thla ni 22-26, 2021 chhunga kalpui tur pualin nimin khan Govt. GM High School, Champhaiah hun hman a ni a. Champhai District Bawrhsap Maria CT Zuali chuan khuallian niin he hun hi a hmanpui a, zirlaite hnenah rulhut hlo, Albendazole Tablet sema eitirin bul a tan a ni.
He hun, Champhai DEO TT Laltanpuia kaihhruaiah hian khuallian Maria CT Zuali chuan, ram hmasawn zelah hriselna kawnga hmalaknate ngaihpawimawh a ni tih sawiin, National Deworming Day chu rulhut laka naupangte an fihlim theihna tura hmalakna pawimawh tak a nih thu a sawi a. Ei in leh ran vulhte atanga rulhut kai theih hrang hrangte sawiin, zirlaite chu ei leh in hrisel, fai leh thianghlimte chauh ei tur leh chenna in leh a velte vawngfaia ngun taka kut silfai thin turin a chah a. Rulhut vanga thisen tlakchhamna, anaemia awm thin chuan taksa chak lohna, naupiang hrisel lohna leh nghawng tha lo tak takte a thlen thin avangin hmeichhia ten Iron leh Folic Acid ei a pawimawh tih a sawi bawk.
CMO Champhai Dr. R.Lianmawia chuan, naupang hnena rulhut hlo pek thin, Albendazole Tablet chu huam zau leh him bera ngaih a nih vanga thlan a nih thu leh a sawi a. India ram thingtlang khuaa thanglai naupang tam takte thisen tlakchham chhan chu rulhut pai vang a ni tih finfiah a nih hnuah, nuaibo turin National Deworming Day kaltlangin chak taka hmalak a nih thu a sawi a. Thisen nei tlem chunga naupaiin naute sawngnawi leh chhiat thleng a awmtir thei tih sawiin, rulhut hlo ei beihpui thlak chuan nakin zel atan nu nau chunga thi leh nausen thi ven
kawngah kawngro thui tak a su thei dawn a ni, a ti bawk.

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More