District Task Force for Immunization (DTFI), Champhai chu nimin khan Henry C. Lalrawnkima, Addl DC hovin an thukhawm a; sakhuana avanga hridanna la duh lote harsatna sutkian a harsat thu sawi lan a ni.
CMO Dr. RLianmawia chuan Nausen pianghlim, Nu nau pai leh Nausen thla ruk chin chunglam te hridanna pek thin dan a tarlang a, hridanna lak avanga harsatna awm palhte chhui zuia enkawl thin an nih thu a sawi bawk.
Raltlan zingah Covid 19 hridanna bakah naupang leh nu nau paite hridanna hi a theih chin chinah pek an ni tih tarlan a ni a. Sakhua avanga hridanna la duh lo te’n an lak theihna tura, hmalak dan te, hridanna lak duh loh avanga nausen thi an awm tih te tarlan niin, Sakhuana avanga hridanna la duh lo an nih avanga harsatna sutkian a harsa tih sawilan a ni bawk.
Thutkhawma tarlan dan chuan, Champhai District-ah mi 71,568 te’n Covid 19 hridanna an la tawh a, an zinga mi 29,104 te chu dose kima la tawh an ni a. ID leh Adhaar Card nei lo leh raltlan mi 2,002 hnenah hridanna pek an ni a. Heng bakah hian naupai mi 307 te hridanna pek an ni a.
Sakhuana avanga hridanna la duh lo leh VLTF zingah hridanna dose kima la ngam lo an awm tih sawi lan a ni bawk. Tuna DCHC a hri vei natna langchhuak enkawl ngai zinga a tam zawk chu hridanna la lo an ni a, tun hnaia hri kai hmuh chhuah za zela 45 te chu kum 18 hnuai lam, hridanna la lo an ni tih sawi lan a ni bawk.
Covid 19 hridanna la lo zawn chhuaha an lak vek theihna tura hmalak zui zel ni se. Data mumal zawk vawn a nih theihna tura theihtawp chhuah in, hridanna lak thatzia leh hridanna lak loh a pawizia tarlanna tur Statistics tih chhuah thin ni se, raltlan te’n vaccine an lak theihna turin hotu lian lamah thlen ni se tihte rel a ni.
Comments are closed.