Hri leng avanga kum hnih chhung hun pangngai anga Pastor Bial Inkhawmpui hman theih a nih loh hnuin, Zirtawpni atang khan Champhai District chhunga Pastor bial hrang hrangte chuan Bial Inkhawmpui hmangin nizan khan an tiak fel ta.
Zirtawpni khan Standing Committee leh Nomination Committee an thu a. Zirtawp zanah Kohhran hrang hrang leh Pastor Bial report ngaihthlak a ni. Inrinni ni lengin rorel inkhawma hun hman a ni.
Inrinni rorel inkhawm neihah Champhai Vengthlang Pastor Bial leh Champhai Bethel Pastor Bial chuan Mizorama Grape tui sawr hi Sakramental Wine atan hman dan kawng zawn ni se tih chu Presbytery inkhawmpuia kal zel turin an pawm. Presbytery Inkhawmpui ah hemi chungchang hi ngaihtuah leh a ni anga, chutah Rorel Palai ten an pawm a nih chuan Presbyterian Inkhawmpui lian ber Synod Inkhawmpui ah rel leh tur a ni.
Nimin chawhma lamah thlarau lam thupui ngaihthlak a ni a, Chawhnuah Lalpa Zanriah Sakrament an kil ho a. Nizan khan Bial Chairman kalchhuak hnen atangin Veledictory Sermon ngaihthlak a ni a, nizan hun hman hnu hian Bial Inkhawmpui hi a tiak zui ta a ni.
Comments are closed.