SANGHAL THI TE RUANG ENDIK

Get real time updates directly on you device, subscribe now.

July ni 19, 2022 a Leisenzo ram Leisenzo khaw chhung atanga km 6 vel bawra hla, Ramlaiphul rama a chhan hriat loha Sanghal 3 thi hmuhte ruang chu vawiin khan A.H & Vety Department leh Forest Department hotuten a hmunah kalin an enfiah.
Thudawn bawhzuiin Champhai atangin Veterinary Officer Dr. Lalrinhlui leh Khawbung atangin Forest RO Pu T.Laltlanhlua ten Sanghal thite hi a hmunah kalin an enfiah a, Department-a thawktute, VC leh khawtlang mi thenkhat ten an tawiawm bawk a ni.
Sanghal thite hi a pui 2 leh a note 1 niin, an thihna hi a rei deuh hlek tawh avangin sample duhthusam anga tha lak tur awm lo mahse, sample theih ang angte endik tura lak a ni a. Sanghal thite hi uluk taka phum nghal an ni.
July ni 1, 2022 khan Samthang ram chhung Zopui phul hnuai ram ngawa Nghalchang pakhat thi chu AH&Vety Department leh Forest Department hotuten an lo enfiah tawh bawk a ni.
Hetihlai hian African Swine Fever vangin Champhai District chhungah Vawk 11 a thih belh leh.
Nimin khan hmun 4-ah Vawk thi hi awmin, Leisenzo-ah 4 an thi a, Dinthar ah 3 thiin, Samthang leh Buang ah te 1 ve ve a thi bawk a. ASF kaihhnawihah vawk suat an awm lo thung. Champhai District chhungah African Swine Fever leng thar leh tuar nasa ber Farkawnah chuan Vawk 859 thi tawhin, Vawk 1806 suat tawh a ni a. Farkawna ASF kaihhnawiah Vawk thi hi 2,668 a tling tawh a, Champhai District chhungah ASF vanga Vawk thi za zela 34.94 chu Farkawn a mi a ni. Champhai khawpui chhunga Vawk hri leng tuar nasa ber, Hmunhmelthaah chuan Vawk 270 thi tawhin, Vawk 218 suat a ni tawh bawk.
Heti hian Champhai District chhungah African Swine Fever vangin Vawk 3646 an thi tawh a, Vawk
4000 suat tawhin ASF kaihhnawiha Vawk thi hi 7646 a tling tawh a ni. ASF hri leng thar hian Champhai District chhunga khua leh veng 40 luh chilh tawhin, hmun 29 chu vawk hri lenna hmunah puan mek a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More