Nimin khan Champhai Passion Fruit Growers Society hruaitute chuan District Bawrhsap hovin Sapthei tui siam chhuah tur an enchhin.
Champhai Pasion Fruit Grower Society hi Champhai leh a chheh vela Sapthei thar chhuah atangin Sapthei tui siam chhuak turin an in ruahman mek a. Sapthei tui an siam chhuah tur Sample hi SAWE Mumbai-ah thawnin SAWE hian Sample 3 rawn siam chhuakin, heta tang hian duh thlangin Champhaiah Sapthei tui an siam chhuak dawn a ni. Sapthei tui siam chhuahna tur hian Industry Dept chuan IIDC Complex Zote-ah ram an hawh a, Association hruaitute hian NEC ah Sapthei Processing Unit dinna tur an dil mek bawk.
SEDP hnuaiah Pilot Project atan Mualkawi leh Ngur khuaah te chhungkaw 20 ve ve in Sapthei hi an ching mek a. Sapthei hi One District One Product-ah thlan mek a ni. Champhai Bawrhsap Maria CT Zuali
chuan Sapthei tui mai bakah Wine siam chhuak tura hmalak mek a nih thu sawiin thlai nung duh leh Champhai leilung ngeih tak a nih avangin, hlawk zawkin Sapthei hi thar chhuah theih beisei a ni, a ti a. Factory a ding a nih chuan thalai tam takin hna an hmu ang a, kut hnathawktu te’n man man zawkin Sapthei an hralh chhuah theih bawk chuan, intodelh kawngah hma kan sawn ngei dawn a ni, a ti.
Mizoram chhunga hralh bakah state danga thawn chhuak thei tura tun atanga rilru nghet tak nei chunga hma la turin Society hruaitute chu a ngen a ni.
He hunah hian R.Thangseia, Champhai Passion Fruit Growers Society, Chairman chuan DC hmalaknaa Sapthei tui siam chhuak tura ruahmanna kal mek chu lawmawm a tih thu sawiin, kut hnathawtute hmakhaw ngai leh intodelh theih dan tur tuipuitu District thuneitu Champhaiin a nei chu vannei an inti a. Mizoram tan pawha thil tha puak chhuah ngei an beisei tih a sawi bawk
Comments are closed.