Hnahlan khuaa Self Help Group 5-a Member mi 50 te chuan an hminga loan puktu mi 3 – Lucas Thangmangliana, PS Zatuang leh Paulamthang te lakah FIR an theh lut.
Thu dawn danin, Nikum 2021 March thla khan FIR-a hming tarlan mi 3 te hi Hnahlan khuaah kalin, Kut hnathawktute hamthatna tur Central Sorkarin loan tha mi Bank kaltlangin a pe chhuak dawn ni-a sawiin, Self Help Group 5, member mi 10 zel awmna din tur leh an hminga loan buaipui a, member pakhatin Rs. 1,60,000 zel chang a, an buaipui hah man Rs. 40,000 zel chang ve turin an thlem a. Hnahlan khuaah hian kut hnathawktute chuan Self Help Group 5 dinin SHG pakhatah member 10 zel an awm a, heng Self Help Group 5 te hming hian Kum 2021 October ni 22 khan Mizoram Rural Bank-ah pawisa Rs. Nuai 80 puk a ni ta a. Loan puktu mi 3 te hian a tirah Self Help Group member-te hnenah hian hming an ziah man Rs. 12,000 theuh an pe a, hei hi an fanghma no ei tur niin an sawi a. Hemi bak hi chu pawisa an dawng zui lo tih SHG member-te chuan sawiin, an hminga loan puk zawng zawng zawng chu heng mi 3 te hian an la chhuak ta vek niin an sawi bawk.
Kumin April thla khan Loan an pukna Mizoram Rural Bank atangin ba thinna an dawng ta a. Loan an puk pawisa an hmuh si loh avangin Champhai Police Station-ah thubuai an thehlut ta a ni. He thil thleng chungchang hi Champhai Police te chuan chhui zui nghalin, he thila inhnamhnawih nia hriat Paulamthanga chu an man nghal a.
Mi dang pahnih Lucas Thangmangliana leh PS Zatuanga te erawh chu an tlanbo avangin man theih an ni rih lo. Champhai Police te hnuchhuina kal zelah heng mi 3 te bakah hian he thila inhnamhnawih dang pahnih Tuangzapauva leh Jacob Thanglianchina te an man tawh a, thu zawh fiah turin Police ten an kawl mek.
Champhai Police te sawi danin Hnahlan khuaa mi 50 te hming hian Mizoram Rural Bank-ah Loan Rs. Nuai 80 puk a ni a. Hei bakah hian Champhai Bethel veng, Champhai Vengtharah leh Tuipuiral tlangdungah chhungkaw eng emaw zat hmingin loan hi an puk bawk a; a vaiin chhungkaw 1250 vel hmingin Loan Rs. Nuai 2000 chuang an puk nia hriat a ni.
Comments are closed.