Sermon

Thawhlehna – Thihna Hnehna
Chang thlante : I Kor 15: 1-34, Hebrai 2 : 14-15
Thawhlehna hi Bible zirtirna chiang tak leh kohhran thurin nghet tak a ni. Isua thawhlehna thuchah atang hian thurinte hi an lo to chhuak thar vek a ni. Thuthlung Thar kohhranah hian Krista thawhlehna hi kawng hnihin a inlan a. (1) Chhangphel : Hei hi sacrament rawngbawlna a ni. A tir atang rengin zirtirte khan inkhawmnaah chhang phel an ching thin. Hei hi Isua a tholeh ngei a ni tih hre lo tan chuan lungngaihna tuar rual loh hriatrengna a ni a, a hretu tan chuan ‘Chhang phel atang chuan a hmel an lo hre ta’ tih chu an testimony a ni ang. (2) Thu : Lalpa an khenbeh hnu chawlhkar tlemte chhungin zirtirte khan Lal Isua thiamlohchantirtute kha hmachhawnin a thawhleh thu leh lalna thu an hril a ni. Paula pawhin Felika hmaa a din khan ‘Mitthi thawhlehna thuah vawiinah hian in hmaah chhuahchhalhin ka awm a nih hi’ a tih kha. Tin, Thuthlung Thar ziaktute chuan Krista thawhlehna hi Pathian thu puanlawk tihkimna niin an ngai. Thawhlehna hian Pathian thu dikzia a rawn tilang a, a awmzia a lo chiangin thu hrilhlawk leh thuruk pawh hriatthiamna tharin a chhiar theih a ni. Thuthlung Thar ziaktute chuan Krista thawhlehna hi Pathian hnathawh a nihzia an tarlang a. Lal Isua thawhlehna chu thiltih mak a ni a, Bible thlir danah chuan thuruk, sawinep theih loh a ni. Mihring hriatthiam bak thumak a ni a, tirhkohte pawh kha thawhlehna thuhretu an ni na a, an hrihfiah ngai lo va, an puang chhuak tawp mai thin a ni. Lal Isua hi a tho leh ngei a ni tih finfiahna kan hriat mai theih te chu thlan ruak, a inlarnate, kohhran lo ding thar, tun thlenga la ding zel, thuthlung thar bu, chawlhni lo awm ta leh keimahni te kan ni.
Thawhlehna – Thihna hnehna : Lal Isua thihna ata a thawhlehna hi hnehna a nih thu kan chhui bik ang. Mihring kan nih chhunga thil rapthlak ber chu thihna hi a ni. Thih kan hlau a, thih hlauh thawnawma kan awm chuan kan thla a phang thin. Mahse, Bible chuan engtiklai pawha thi thei kan ni tih theihnghilh lo turin min duh a ni. Thihna hi chi hnihin lo then ila:
1) Taksa thihna : Hebrai-ho chuan thihna hi mahni pate hnena hruaia awm, hmun nuam lo deuha awmze nei mumal lova awmna te an ti a. Taksa thihna chu kan mihring nun tawpna, taksa leia a channa te kan ti thei ang. Thuthlung Hlui mite’n thih an hlauh chhan ni a lang chu awmloh hlen vang vangna ni lovin, Pathian nena inpawlna tawp tur an hlauh vang zawk a ni. Keini hriat danah pawh tawp hlen vang vangna a ni lo va, thih hnu piahlam pawh a la awm zel a ni. Thihna tihbaiawmna chhan chu thinur lo thleng tur vang a ni zawk. He taksa thihna hi a ni, Lal Isua thawhlehnain a hneh chu. Thih hlauhna bawia awm te a rawn chhanchhuak ta a. Pathian thi thei lo chuan Kristaah thihna chu a rawn tem a. Mihring nun zawng zawng zawhin a rapthlak ber thihna thlan thim pawh a dai a ni. Thlanah zalh ni mahse thihna chu hnehin a taksa ngeiin a tho leh ta. Amah ringtute chu he thihna hnehna nunah hian an cheng a, mihring pumpui dinhmun chu Krista thawhlehna nunah chuan a lo inthlak danglam ta a ni. Taksa thihna chu la tawk tur ni mahse thihna chu muthilhna ang lekin a thlir thei a. Nakinah, ni kinni ah taksain, tihdanglamin a la tho leh dawn a ni tih leh Amah angin kan la awm dawn a ni tih hriatna leh rinnain a inthlamuan thei thin a ni. Kan thurinah pawh Taksa thawhlehna ka ring tih kan nei. hei hian tisa, taksa a kawk a ni. Lal Isua pawh kha taksa ngeiin a tholeh tih a chianna chu thlan ruak mai bakah sanhedrin-te khan Isua ruang tawih rawn pholan tur an nei lo. A taksa, mihring ruangam puin, tihdanglam leh thiltitheiin a lo tholeh a ni. Tunlaiah taksa thawhlehna sawi bo zawng thurin pawm awlsam zawk te a lo chhuah lai hian tirhkohte zirtir, Bible-a kan hmuh ngei hi kan pawm tlat a tul hle a ni.
(2) An sualnaa la awm rengte thihna : He thihna hi sual hlawh, Pathian nena inmihranna a ni. Sual hian Pathian nena inpawlna a dal tih hriat a nih atangin Bible mite chuan sual leh thihna hi thil inzawm a ni tih an lo hre ta a. Gen. 3- ah chiang takin sawi a ni. Ezekiela bu ah pawh thil tisualtu apiang an thih tur thu leh misual thihnaah Lalpan lawmna reng a neih loh thu kan hmu. Suala awm reng apiang an thi a, anmahniah nunna reng an nei lo. He thihna rapthlakna chu he khawvel tlu tawhah hian helna leh Pathian laka inlakhranna a ni. Lal Isua khan misualte chu mi bik leh tute emaw bik nia ngaihna a letthla a, mimal tin chungchang a ni zawk a, an hria emaw hre lo emaw an mawhphurhna a ni emaw ni lo emaw, mitin huap a ni. Mihring avanga thihna a lo awm avangin mihring vang vekin mitthi thawhlehna a lo awm ta bawk a. Adama ah chuan mi zawng zawng an thi thin ang hian tih te kan hmu. Krista thawhlehna avang hian thihna khur thuk ber Pathian laka tihhranna chu hnehin a lo awm ta a, Krista ah chuan tihnunin kan lo awm ta a ni. Sual leh a thiltihtheihna chu hnehin a awm a, ringtu’n Krista a zawm ni hi a thawhlehna hmasa a ni. Krista rualin min tinung ve ta a ni. Thawhlehna leh inremlehna hi Krista zara lo awm, thil inzawm tlat niin Paula chuan a sawi. Hei hi thihna, sualna leh ramhuai hneh hlenna a ni.
He hnehna hi rinna a hriatthiam chi chauh a ni. Tholeh Krista chu ringtute hnenah chauh a inlar thin a, a lo kal leh hma loh chuan rinna mit lo chuan hmuh theih a ni lo. Hetiang zawng hian Lalpa thawhlehna chu hun hnuhnung atana chhinchhiahna ang emaw, khawvela Pathian hnehna ropui, khawvel piah lama Pathian a lo famkimna tur entirna ang pawhin a thlir theih a ni.
Hetiang hi a nih avangin Thu- thlung Thar chuan thawhlehna hi hun hnuhnung lam hawiin a thlir a. Tun kan damchhung la la hian chatuan nunna ringtu chuan a nei a ni tih sawi chianna a ni a, a awmzia dik takah chuan thihna atangin nunna ah a lut ta a ni. Hei hi rinna a neih theih a ni. Tunah pawh Krista chu rinnain kan hria a ni. He kan Lalpa Isua leh a thawhleh thu hril hi khawvel tawp thleng pawha kan hna ropui ber tur a ni.
Lalpan a thu malsawm rawh se.