Sermon

Lal Isua i chawimawi ang u
Chang thlante : Matthaia 21;1-9, I Petera 3:15
Vawiin hi Tumkau Ni a ni a, Isua chu vawiin angah hian hmanah Jerusalem khawpuiah lal angin sabengtung no chunga chuangin a lut a ni. He khawvela hun a hman chhung zawng khan, vawikhat chiah, he Tumkau ni ah hian chawimawi a hlawh ve a ni. Pharisaite chuan mipui hlim taka Isua hmuaka lo au te chu a bengchheng tiin khap turin an la ngen lehnghal a. Keini, ringtute nunah pawh hian kan pianthar hlimchhawn bak hian Isua hian chawimawi a hlawh meuh lo em aw?? Vawiin hian kan thinlungah Isua hi Lalah i pawm thar leh ila, i chawimawi thar leh ang u.
Lal dangdai : Isua hian Pilata hmaah khan lal a nih thu hi a pha lo. Mahse, khawvel lal te angin leilungah lalram a nei lo va, tisa takin ralthuam nen hmelmate a bei lo va, a khawnbawl ve te lah chu sangha mantu Petera, Johana tih vel an ni. Chuvangin, a hunlaia Judate khan lal a nihna hi an pawm thei lo. An beisei Messia, Rom- ho awpbehna lak ata chhanchhuaktu nen chuan a inpersan lutuk tlat. Vana a lawn dawn thlengin a zirtirte pawhin an la hrethiam chuang lo. Indopui laia Europe ram tak tak hneha lalram dintu Napolean-a chuan a thih dawn khan, “ Isua kha chuan a thih hnuin lalram a nei a, a zau zel a; kei erawh chuan ka damlai la la pawhin lalram ka nei ta lo” a ti. Ni e, Isua lalram chu leilunga ramri khamsak theih a ni tlat lo. Mihring thinlungah a lalram din a, a lalram a dinna mite chu nakinah vanah Chatuan Lalram chen tura min hruai haw a tum zawk a ni. Keimahniah hian thuneihna pumhlum neih a, a duhdana kan nun hruai a duh. Isua lalna pawmin, a lalram chhunga awma, a venhimna hnuaia awm turin a hnenah i intutulut dawn em? Nge, thim lal Setana bum leh tiduhdaha awm turin i la inphal cheu dawn?
Chawimawi tur – Lal Isua : Khawvelah hian lal tam tak an lo piang tawh. Mahse, chawimawi an phu vek lem lo. Lal tha leh ngilnei awm bawk mahse, lal thenkhat chu an mipuite tan hluahawm leh phurrit an ni. Tuna mi tam tak thinlunga lal, Setana pawh hian bumna hmangin mi a thlem a, a hnuah duhtawkin min nghaisa a, he khawvela kan hreawmna piahah meidilah min hnuhluh a la tum cheu! Setana hi chu a zui tlak loh a, chawimawi tlak thlawt loh. Isua erawh chuan kan harsatnaah pawh min chhanchhuak a, thlamuanna leh hlimna min pe thin. Kan thih hnuah he leia min temtir tan tawh vanram hi a famkimna in kan la chen dawn zui! Chawimawi tlak a va ni tehlul em!
Engtinnge kan chawimawi ang? : 1) Tawngkamin : Lal Isua ngei pawh khan ka a amah tan hi a duh tih a sawi. In thianho titina ah Isua tanin i ka ang fo mah teh. Nangmahah huaisenna a pe ang che a, Isua ta i nih pawh i chiang tawlh tawlh ang. Tin, i thiante’n Ani chu a piangthar chiang a ni, a tan ngam em mai, an ti che ang a, Isua i chawimawi a lo ni ang. Bialnu/bialpa te nena awm falna hmunah emaw zu hmunah emaw Kei chu ka piangthar tawh ti ngam ngat chu Isuan a phatsan miah lo vang. Keiniho hi chu thlemna hmunah kan tawngkam hi a dawih nghal dui zel a, Setana tan nek kan nuam em a lawm. Camping chhuah hlimah khawlai kan han fanga, Isua chawimawiin kan au rual thin. Hei hi Isua chawimawina leh hnehna a ni. Hun a lo rei a, au zel a remloh hunah pawh i titina ah tal Pathian tan zel rawh. Ringtu inti si, titihona a Pathian thu sawi tur hre miah lo kan nih chuan kan ngaihtuahawm ngawt ang.
2) Thiltihin/Nungchangin : Tawngkama Isua chawimawi ai maha chiang zawk chu kan nuna Isua hmel lantir hi a ni. Tawngkama Isua kan tan hle a, kan nungchanga Isua duhzawng a lan miah si loh chuan kan la chiang lo a ni ang. Hla siamtu’n “Ka tih thinte ka tih a rem tawh lo, ka tih ngai lohte tih a tul zawk a” a tih hi a dik hle mai. Kan sualna leh manganna laka min chhandamtu atan chauh ni lo, kan thinlunga lal atana Isua hi kan pawm takzet chuan kan nun a inthlak lo thei lo. Kan tawngkam te, kan duhzawng leh kan thiltih thin te a inthlak a, chu chu miin an hmuhin Isua an chawimawi thei thin. Tawngtai ngai lo khan tawngtai kan lo ngaina ta a, inkhawm peih lo em em kha kan inkhawm ta fo va, Bible chhiarin Pathian thu kan lo tuipui ta hle bawk a. Heng hmang hian Isua kan chawimawi a ni.
3) Thuawihnain : Tawngkama Ka nu leh ka pa chu an fel a sin, tih hi kan nu leh pate chawimawina a ni mai lo. Kan chawimawina ber zawk chu an thu kan awih hi a ni. Chutiang chiah chuan Pathian thu sawi tui thei hlein, inkhawm te pawh pelh lo mah ila, Isuan nundan tur min hrilh te kan awih duh si loh chuan mite’n engah mah min ngai lo vang. Isua mite kan ni tih mite’n an hriat theihna chu a thupek kan awih hi a ni. Bible ah hian Pathian thu, a taka kan nunpui tur tam tak kan hmu. Kan pipute’n Pathian thuawih tih hming an put lai khan mite’n an nunah Lal Isua an hmu a, rei lo te ah Kristianah kan inlet vek a nih kha. Kan nunah hian Isua chawimawiin a awm ve em le?