Sermon : HE RAMAH HIAN AWM LA
RINAWMNA UM ZEL RAWH
– Kan ram rorelna hi mipuite sorkar (democracy) chu kan ti ve ziah na a- A nihna takah chuan, kan inthlang a, sorkarna chelhtu Party apiangin an duh ang angin Party dangte an palzutin ro an rel a ni ber mai a.Mitin tana tha tur khawp malsawmna khawiah mah a thleng phak lo.Mi tlem te chauhvin malsawmna an pumbilh a ni,’ tiin Beihrual Thupui 2007 naah khan kan hmu a.Hei hi Party Politics tha lovin a hrin chhuah a ni. A pawi takzet a. Hei hi MPF chuan tihreh tumin hma a la ngar ngar a nih hi.
Kan ram innghahna hi eng nge ni le ?
Kan ram kalphung, Pol. Party zia hi han thlir vang vang ila: Kan chhiat phah tur nia lang ta ber chu- Party ban chakna ringin kan ram rorelna hi kan kalpui ta zel mai niin a lang tlat mai. Hei hi thil pawi tak a ni. India ram dangte kan lo tehkhin ngawt ange.Keini ram hi zawng Pathian nung be ram kan ni tlat!! Jer. Bung 17-ah chuan, ‘Mihring rin chhana, mihring ban chakna ringa Lalpa hawisanna thinlung neitu chu anchhe dawngin awm rawh se,’ tih kan hmu tlat mai si a.Ringtute’n kan hmuh hmaih a thiang lovang.Kan ram leh hnam hian Pathian aia innghahna / rin zawk tur kan nei nia kan inhriat aia hlauhawm hi awm theiin a lang lo.Hei em em hi zawng kan ni rih love kan ti deuh a ni thei e. Mahse, kan chetzia hian hei hi a hawi tlat !! Hlauhawm a kai a ni. Hei hi hriain tlawmngai pawl an ngawi thei tawh lova, Kohhran a ngawi mai mai thei ta lo. Mizoram dung leh vangah mutmawh hnar mawha neihin a lo che chhuak ta anih hi. A innghahna hi Lalpa anih tlat avangin hnehna pawh a chang zel ang.
Thil tha lo titute avangin i intilungngai ve thin em ?
Tin, Pathian kan rinna aia thildang, therhlo engemaw mai maia kan rinawmna lo tibawrhbang duh kan awm ta nawk maite hi ava’n pawi em !! Hemi ah hian Party te an pawimawh ang bawkin mipuite kan pawimawh hle. ‘ Hei hi in chhungkaw lei nan,’ min vote dawn chuan..hei hi …tiin pawisa an rawn pe ngawt ngai lo an ti. Chhungkaw tam takin Party te dawrin, ‘ Kan chhungkua chuan vote chuti zat kan nei a, tiin an dil zawk thin an ti. Kohhrante kan tan a ngai hle. Kan biak Pathian nghak zo lova kan tih thinte hian eng hi nge min thlen thin le ? I han inchhut chiang chiah teh ang u. Kan chhungkua hian kan nawmpui zui ta zel em le ?
Sam ziaktu’n, helai chang a ziah hun lai leh kan tunlai dinhmun hi a inang awm mange. Pathian tih a, a duh zawnga awm tum tlat mai hi he Kohhranah ngei pawh hian engemaw zat an awm ngei ang. Mahse, chungte ai mah mah chuan, Pathian hlauhna leh tihna pawh nei lem lova, a theih ang anga ham bawrh bawrh maite hi an lian thur thur ta mai zawk em ni aw ? ti a ngaihtuah theih chang a awm fo ta mai. ‘Mite pawhin an ti alawm’ ti a engemaw ho te te a kan hlutna /rinawmna kan hralh duh ta mai te hian Pathian pawi kan sawi a ni tih hi kan inpawm thei em ? ‘Hei hi Isua zara ka ta’ kan tih ngam ngei lo hi chuan min tihlim chuang hauh lo, mai nilovin, kan tan phurrit, chhiatna thlentu an ni fo zawk tlat,’ an ti thin asin ! Keiniho hian kan pawm thei em ? I han inzawt teh hlawm ang le
Comments are closed.