East Tuipui bialtu MLA, Ramthanmawia, Bamboo Link Road Board Vice Chairman ni bawk chuan nimin khan Sesih PHC, Champhai District-a hman turin MLA Fund atanga ruahman Ambulance (Maruti Eeco Van) thar chu Sesih PHC Medical Officer Dr. Eric Zaukhin kutah a hlan.
Ambulance thar hlanna leh lawmna hun T.Nghakliana kaihhruaiah hian thu sawiin, MLA Ramthanmawia chuan Sesih PHC a Ambulance dah tulna leh mamawhnate hriaa, PHC huam joint VC te hmalakna leh thahnemngaihna fakawm a tih thu a sawi a. A enkawl zui zel kawngah tih tur a la tam a, ngaihtuahna nasa tak seng chunga Joint VC te inpekna leh inhuamna avanga Ambulance neih a ni chu lawmawm, a ti a. Sawrkar hriatpui thlap leh sawrkar ta Ambulance chu neitu thinlung pu chunga enkawl turin a chah a ni.
East Tuipui bialtu MLA chuan।hrileng avanga fimkhur tak chunga hun hman a nih thu leh bial mipui harsatna hriatpuia a ngaihven reng thin thu a sawi a. Hrileng hian engtikah nge min kiansan ang tih hriat ni lo mah se min chenchilh rih a, fimkhur takin nunphung pangngai hloh chuang lova khawsak zir thiam a tul a ni, a ti.
Bamboo Link Road Board Vice Chairman chuan Covid-19 hrileng avangin hmasawnna hnathawh thuanawp rih mah se, sawrkar flagship programme SEDP kaltlangin hrileng boruak ziaawm ve leh chak taka hmalak tum a ni, a ti a. Bungzung PHC sak zawh hunah Sesih PHC sak that hna pawh hmabaka neih a nih thu sawiin, a bial chhungah hmasawnna ruhrel thawh chhoh mek leh hawn mai theihte a awm nual thu a sawi a. Kum khat chauh Doctor-in a la thutchilh, Sesih PHC ah hmasawnna hmuh theiha a awm tih sawiin, Nurse leh hmanraw indaih lohnate pawh Department hotute nena inrawn tlanga buaipui zel tum a ni, a ti.
MLA Ramthanmawia hian Khuangleng Branch YMA hnenah Oxygen Concentrator a pek bakah, VLTF hnenah Test Kit, Sanitizer leh Mask a pe bawk.
Comments are closed.