SIALHAWK PA INPEKNA VANGIN HMASAWNNA KALPUI ZEL THEI DAWN

East Lungdar atanga Khawzawlin Kawlphetha 132 kV Line a lakna tur line enchhin tur hmalakna kal zelah dinhmun hlauhawma ding, In ding lai thiah a ni.
Mizoram khaw chhak tlangdungin Kawlphetha an dawn kawnga harsatna awm thinte sutkianna tura hmalakna kal mekah September ni 28, 2021 khian Bukpui, Serchhip atangin East Lungdar to Khawzawl 132 kV Line kaltlangin Khawzawl thleng power lakluh enchhinna, test charge neih tum a ni a.
Inpuahchahna kalpui mekah electric hruipui hnaih leh dinhmun hlauhawma awm theia ngaih Sialhawk Dinthar Venga Vanlalniliana In sak mek chu 132 kV Line a hnaih avangin nimin khan thiah a ni.
In sak mek hian 132 kV Line a hnaih lutuk avangin chhiatna thleng thei reng a ni tih Power & Electricity Department Khawzawl chuan Khawzawl DC hnenah an thlen a. Hei hi bawhzuiin Khawzawl District Disaster Management Authority chuan, Disaster Management Act, 2005 tlawhchhanin In thiat turin thutlukna a siam ta a ni. In thiah tak Vanlalniliana tanpui nan hian K.Duhsanga, Sr. EE, Khawzawl Power Division chuan tanpuina sum a pek bakah, Khawzawl DC Office, SDRF kaltlangin tanpuina pawisafai an pe a. Khawzawl DC aiawhin James Lalnithanga, SDO (Sadar) chuan a hlan a ni.
K. Duhsanga, Sr. EE, Khawzawl Power Division chuan September ni 28, 2021 hian East Lungdar-Khawzawl 132 kV Line test charge neih a ni dawn tih a sawi a. A hlawhtlin theih chuan Khawzawl, Champhai leh Saitual District-te tan hmun hnih atangin power lakluhna a awm thei tawh dawn tih a sawi bawk.
In thiahnaah hian James Lalnithanga, SDO Sadar; K. Duhsanga, Sr. EE, Khawzawl Power Division; P&E thawktu te, 2nd IR Bn, Khawzawl hnuaia State Disaster Response Force-te, Khawzawl DC Disaster Branch hnuaia Quick Response Team-te leh Sialhawk Advisory Board-in hnatlanga thawk chhuak tura a kohte an tel a ni.