Mizoramin State a nih champha vawi 34-na chu Mizoram hmun dangte rualin Inrinni khan I&PR Auditorium, CHANEM, Champhaiah Bawrhsap Maria CT Zuali hova lawm a ni.
Maria C.T. Zuali chuan District mipuite State Day pualin chibai a buk a. State puitling nih mai bakah rilru puitling neih a tul thu sawiin, rinawmna, taimakna leh mahni intodelh tumna rilru kan neih a ngai a ni, a ti a. Sawrkar chu tu dang nilovin sawrkar siamtu mipuite an nih avangin ram hmangaihna rilru pu tlat chunga mahni mawhphurhna theuhte dik leh fel taka hlenchhuah tum turin mipuite a chah a ni.
State Day lawmna puala thusawitu Lalnunmawia, Principal (Retd.) Govt. Champhai College chuan kum 20 leh thla 3 chhung zet rambuaia awm hnuah India ram state 23-na ni turin India Constitution Article 371-G hmanga Mizoram ziah luh fel a nih thu a sawi a. Mipui te chu State Day lawm duhtawk mai lo va, a hlutzia hre thara tangkai zawka hmang thiam turin a sawm a. Remna leh muanna awm theihna leh State puitling nih theihna kawnga theihtawp chhuahtute hriat reng an nih tawh tur thu sawiin, zahna chibai buk thar leh theuh turin mipui a sawm a ni.
MNF Champhai North Block- I President, HS Vanlalfakzuala chuan, State puitlinga Mizoram hlankai a nih theihna kawnga hmalakna hrang hrangte tarlangin, nakin lawka ram hmasawn leh changkang, thangtharte tana chenfakawm leh innghahna tlak siam kawngah ngaihtuahna thar senga theihtawp chhuah a ngai tih a sawi.
He hunah hian Rev. R.Lalthapuia, Kahrawt Bialtu Pastor (Presbyterian) chuan hunserh a hmang a. State Day lawmnaah hian Rex Zarzoliana Vanchhawng SP, Sawrkar Office hrang hrang hotu te, YMA Sub-Headquarters, MUP leh MHIP Sub-Hqrs., MJA leh Political Party aiawhte an tel a ni.
Comments are closed.