UD&PA Champhai chuan PMAY-Housing for All (Urban) 2022 Mission kaltlangin In sak tanpuina diltu 958 hnenah first installment a pe tawh a, second installment hi 688 ten dawng tawhin, mi 537 ten third installment an dawng tawh bawk a. In sak tanpuina sum pekchhuah tawh zat chu Cheng Nuai 1148.70 a tling tawh.
Khawpuia cheng mahni puala chenna in neilote tana insak tanpuina Scheme Pradhan Mantri Awas Yojana- Housing for All (PMAY-HFA Urban) kaltlanga hamthatna dawng tur thlangtu District Screening Committee on PMAY-Housing for All (Urban), Champhai District chu nimin khan an Chairman Maria CT Zuali hovin DC Conference Hall-ah an thukhawm.
Bawrhsap Maria CT Zuali chuan mahni puala chenna in neiloten chenna in tha an neih theih nan sawrkar laipuiin tan a lak thu sawiin, in sakna tur pawisa dawn hian chenna tha tak sakna tur daih lo mah se, hamthatna dangte line department leh Bank kaltlanga ngaihven theih a nih thu a sawi a. Insak tanpuina dawng tur dik tak ten an dawn theih nan ngaihtuahna fim tak senga thlan a tul thu sawiin, department kut maia dah lo va, theihtawp chhuaha thawhpui turin VC leh khawtlang hruaitute a chah a ni.
Nimin thutkhawmah hian Champhai Town leh Census town huam chhunga insak tanpuina dilte zirchian niin, Management Information System (MIS) portal-a thun tawh hnua dilna thehlut nawn tih hmuhchhuah, inhnukdawk, boral leh chhan dangte avangin mi 39 te chu ngun taka ngaihtuah a nih hnuah an dilna hnawla paih tura thutlukna siam a ni a; thutkhawm leh hunah a thlakna tur ngaihtuah leh ni se, an ti.
Heng bakah hian financial year 2021-2022 chhunga Credit Linked Subsidy Scheme (CLSS) kaltlanga dilna lutte pawh sawiho niin, Economically Weaker Section (EWS), Low Income Group (LIG), Middle Income Group (MIG)-I leh Middle Income Group (MIG)-II ten interest subsidy neia insak tanpuina loan an dil theihte pawh ngaihtuah a ni a.
Thutkhawma tarlan dan chuan financial year 2021-2022 chhunga CLSS target zat 150 atangin diltu 70 chauh an la awm a ni. He hunah hian loan diltuten harsatna awm lova loan an lak theih nana hmalaksak theih dan turte pawh sawiho a ni bawk.
Nimin thutkhawmah hian R. Lalnunkimi, DUDO & Member Secretary bakah, SDO Sadar, SO, DIPRO, MLA aiawh, Bank hrang hrang leh Joint VC hruaitute an tel a ni.
Comments are closed.