𝗧𝗵𝗶𝗹 𝗻𝗶𝗵𝗽𝗵𝘂𝗻𝗴 𝘀𝗮𝘄𝗶𝗳𝗶𝗮𝗵 𝘁𝘂𝗿𝗶𝗻 𝗦𝗮𝘄𝗿𝗸𝗮𝗿 𝗻𝗴𝗲𝗻

Get real time updates directly on you device, subscribe now.

Nimin khan YMA Sub-Headquarters Champhai Office-ah Champhai District huap NGO hrang hrangte chu Seling leh Zokhawthar inkar kawng, National Highway No.6 sial meka Kawlkulh leh Dulte Jt. NGO CC ten hnathawktute laka harstana an siam chungchang thlirin an thukhawm a, hma lak zel dan tur an rel nghal.
Nimina NGO hrang hrang thukhawm chuan an thutkhawm hmasaka an thu tlukna anga Puilo khaw panna penga Kawlkulh mite’n gate an siam thiah a ni chu lawmawm an tih thu an sawi a. Hemi atana hmalaknaa puitu Khawzawl District Bawrhsap, SP leh an thawhpuite chungah pawh lawm thu an sawi a.
Thukhawm chuan National Highway No. 6 sial tlang tumna dodal zawnga hma la an awm zui a nih chuan a tul anga hma an lak zel tur thu an sawi a. Tun Pathianni, ni 23 thlenga kawng sialtute laka harsatna siam an awm chuan a thian fai turin mipui hnatlang koh an tum thu an sawi bawk.
NGO hrang hrang thukhawm chuan,Kawlkulh leh Dulte khua chu National Highway, International Corridor (Seling-Champhai-Zokhawthar) leh Economic Corridor (Seling-Kawlkulh- Champhai) nihphung an hriat fiah loh vanga mi thenkhat ten harsatna siam zui ni-a an ngaih thu an sawi a. National Highway No. 6 sial dan tur leh Kawlkulh khaw dai by-pass road siam a nihna chhan te, chu mipuiin an hriat fiah theih nan Mizoram sawrkar chu, Seling leh Zokhawthar inkar kawngpui sial tura hmalak dan leh hmachhawp, thil kalphung sawifiah tura an beisei thu an sawi bawk.
Nimin tlai khan Champhai District Bawrhsap Maria CT Zuali chuan Champhai SP Lalrinpuia Varte nen Champhaia NGO hruaitute kovin hemi chungchang hi an sawipui a. Champhai Bawrhsap chuan National Highway No. 6 chu, ruahman ang ngeia laih chu duhthusam ber ni mah se, tharum thawh zawnga chet lakna thleng lo se a duh tih a sawi a.
NGO hruaitute hian kawng sial hnathawh mek chu a nihna ang taka laih chhunzawm a nih theihna tura hmalak zel an tum thu District thuneitute hi hrilhin, thuneitu sang zawk lama hma laksak turin an ngen nghal bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More