THINGPHUN HNATLANG NEI

Get real time updates directly on you device, subscribe now.

Environment, Forest & Climate Change Department leh an thawhpuite chuan, Mizoram hmun hrang hrangah thing phun runpui nimin khan an hmang a. Aizawlah chuan Pachhunga University College chhunga City Forest-ah he hun hi Forest Minister TJ Lalnuntluanga hova hman a ni.
India zalenna kum 75-na lawmna Azadi Ka Amrut Mahotsav pualin kumin hian programme hrang hrang siam a ni a. India ram in kumtin a thing phun kutpui (Vanamahotsav) a lo hman thin pawh zalenna lawmna nen kaikawpin, India state hrang hrang khawpui 75 a City Forest ah Thing tiak 75 theuh phun a ni.
PUC a thingphunna hun hi Forest Dept Principal Secretary Jitendra Kumar-a’n a kaihruai a. He hunah hian thingphun hnatlang thawk te chuan thing tiak 75 an phun a ni. Champhaiah pawh Nagar  Van Area, Zote-ah District Bawrhsap James Lalrinchhana hovin thing phun hnatlang neih a ni a. He hun hi khawvel boruak lum chho zel leh boruak bawlhhlawh zel tur ven kawnga thing leh kan vela hmun hring dup hmunte pawimawhzia inzirtir nana ruahman a ni. Nimin thingphun hnatlangah hian thing tiak 1,030 phun a ni a, hnatlangah hian Green Mizoram Committee, Champhai member te; Forest Department thawktu te, Zote VC, YMA, MHIP, MUP leh Champhai Nature Conservancy (CNC) member te an tel a ni.
Mamit-ah pawh nimin khan MHIP Mamit Luangpawl branch leh Mamit Environment, Forest and Climate Change department tangkawp chuan Mamit thlen hma, Zo-ngaw National Highway 108 kawng sirah thing phun hnatlang an nei a, thing tiak 150 vel an phun a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More