Nimin khan Govt. Champhai College-te leh Champhai-a lir thei ke hnih nei pawl pathumte chuan Republic day lo thleng tur pualin Champhai damdawi ina Blood Bank-ah a thlawnin thisen an pe.
Republic Day vawi 71-na lo thleng tur pualin nimin khan NCC bul tumin Govt. Champhai College-te chuan a thlawnin thisen mi 33 (mipa 27 leh hmeichhia 6) ten an pe.
Nimin vek khan 04 bikers-te bul tumin, Champhai-a lir thei ke hnih nei pawl pathum – 04 bikers , Yamaha Riders Club, Champhai leh KTM Family-te chuan Republic Day lo thleng tur pualin thisen hi an pe ve bawk a. Thisen hi mipa 12 leh hmeichhia 1, an vaiin mi 13-in ten an pe a ni.
Pawl pathum ai awh hian KTM family President, Tv.Rosangpuia leh Champhai Yamaha Riders Club President, Tv. Malsawmkima-te chuan thu chhuah intawm siamin, thisen pe tura thawk chhuak zawng zawngte chungah leh thisen pe tura thawk chhuakte ei leh in tur tum saktu – Pu Lawmsangzuala, VCP Melbuk te chhungkaw chungah lawm thu an sawi a. Hetiang tih nachang hria leh thil tha tih duh thalai tam tak bikers pawl 3 zinga an awm chu thlamuanthlak an tih thu leh chhunzawm fo chi ni-a an hriat thu an sawi bawk.
Hetih rual hian, Champhai Dist. Blood Bank-a thawkte chuan, hetianga mi dangte tana a thlawna thisen pek hreh lo thalai tam tak an awm chu lawmawm an tih thu sawiin, nimina thisen petu – mi 46, Govt. Champhai College-te leh Bikers pawl pathumte chungah lawm thu an sawi a. Mi dangte pawh, pawl leh mi mal ang pawha mi dangte tana mahni thisen hlu tak pe thin turin an sawm thar leh a ni.
Comments are closed.