THISEN TLAKCHHAM LAI TAKIN GM SCHOOL NAUPANG TEN THISEN PE

Govt. GM Higher Secondary School chuan kum 25 an tlin champha pualin thisen an pe.
Govt GM Higher Secondary School kum 25-na (Silver Jubilee) pualin NSS Unit-te chuan Champhai District Hospital Blood Bank-a, a mamawh apiangte hman turin thisen an pe a, thisen hi Unit 51 pe-in, mipa 31 leh hmeichhia 20 te’n an pe a.
Blood Bank-a thawk te’n Sikulah kal chilhin thisen hi pek a ni. District Hospital Blood Bank-a thawkte chuan Blood Group A unit khat chauh dahkhawl awm tawh chu nimin lama Unit 16 dawn belh leh a nih avangin tun dinhmunah Champhai Blood Bank-a Blood Group hrang hrang, A tih loh chu Unit 20 chuang vek awmin an phang rih lo tih an sawi a. Tun tum hi kumin chhunga Blood Donation Camp tum 22 an neihna niin tlawmngaia thisen pe thinte chungah lawmthu an sawi a ni.
Govt. G.M Higher Secondary School hi June, 1996 a din a ni a. Tunah hian zirlai 730 leh Zirtirtu 27 an awm mek a. Arts, Science leh Commerce bakah Vocational Course- Horticulture, Health Care leh Computer Technique-te a zir theih a ni.
Silver Jubilee pual hian tuilakna tha tak Jubilee Tuichhunchhuah chu Rs 1,20,000 sengin Sikul tualah an siam a. Souvenir leh Jubilee lungphun buatsaih mek niin, remchang hmasa berah Silver Jubilee lawmna hun hi an buatsaih dawn a ni.