TLAWMNGAI PAWL HRUAITUTE LEH DC

Thawhlehni khan Champhai District NGO Coordination Committee hruaitute chuan
Champhai Bawrsap Maria CT Zuali chu Champhai hmasawnna tur hrang hrang an
sawipui.
Champhai District NGO Coordination hruaitute hian Champhai DC Maria CT Zuali chu a chenna Bungalow-ah an lenchilh a. DC hian Champhai District tana sorkar hmalakna tlangpui leh ramri hrula raltlante dinhmun a sawi lang a; NGO-CC hruaitute pawhin an hmalakna tlangpui an hrilh bakah district tana an hmachhawp hrang hrangah puibawm turin an sawm nghal bawk.
DC Maria CT Zuali chuan, Myanmar sorkar buaina vanga Mizoram chhunga Myanmar raltlan mi 3000 zet chu tunhnaiah Indo-Myanmar Border Trade Point kaltlanga thawn haw an nih thu sawiin, tunah hian District chhung ramri hrulah raltlan eng emaw zatin Mizoram chhung luh tum an awm tih a sawi a. Covid-19 Hripui leng thawh hnihna kal mekin ramri hrul leh Myanmar ramchhung a tuam nasat laiin, hri taidarh zel tur venga fimkhur a ngaih vanga hnawh saruma raltlante tuamhlawm chu tih hleih theih a ni lo tih a sawi.

Tunhnaiah Myanmar ram Chin State chhungah buaina (sipai leh tualchhung mipui
kara buaina) a sosan leh tak vangin Mizoramah humhimna zawnga ramri kan thahnem tak an awm mek a. Mizoram chhung ramri hrul khaw hrang hrangah raltlante hi an lut mek a. Raltlante hriselna enfiah hmasak loh chuan hri inkai darh vak theih a nih rualin, ramri a sample test nei turin sorkar tan tih theih a ni bawk si lo a. Hetih karah hian raltlan hmingpu ve si, sum par lawr leh ruihhlo tawlh pawh awmin, tunhnaiah District Magistrate thupek angin ramri hrulah Heroin Hawng 17 (Rs. 7,50,000) man chu ramri hrulah chawpchilh a halral/tihchhiat a ni nghe nghe a. Champhai District thuneitute pawh thutlukna siam har leh hun khirh takah a dintir mek tih District Bawrsap hian a sawi bawk.

NGO-CC in DC an kawmah hian District
chhunga sorkar hmalakna pawimawh zual : Cheng Vaibelchhe 19 chuang senga Keilungliah lui khuah hna kal mek te; Cheng Vaibelchhe 138 senga Champhai to
Zokhawthar World Bank kawngpui laih mek te; Cheng Vaibelchhe 334 chuang senga Seling to Champhai National Highway No. 6 Double Lane laih hna thawh tur te chu ramro
tling a nih ngei theihna tura hnathawh mek chu theih ang tawka vilpui an tum bak a.
Champhai District Session Court hmunhma leh hmalak zui dan tur te, Champhai Leilet zawla buhbal chinna hmun humhalh zel tura tanlak a pawimawh thu an sawi a. District hmasawnna ruhrelte a tahtawla thlirho zel ni se tiin thu an hnutchhiah bawk.