Nizan hmasa khan Ngaizawl-a ram kang thelh tura thawk chhuak, Pu Khup Sian Sang chu kang thelh tura an kalna kawngah a chesual a, nimin zing khan a hliam tuar loin a thi.
Khawzawl District chhunga awm Ngaizawl khuaah nizan hmasa khan kang thelhnaah Pu Khup Sian Sang (39) H/o Pi Suan Ngaih Dim chu lengkirah a tla a, Champhai District Hospital rawn panpui niin, a hliam tuar lovin nimin dar 2:00 vel khan a boral.
Ngaizawl Branch YMA President Pau Dong Mang hnen atanga thu dawn danin, nizan hmasa dar 9:00 vel khan Ngaizawl atanga Champhai lam panna kawng, Ngaizawl atanga Km 1 vel a hla Telsuan ram chu a kang a.
Ngaizawl VC bultumin khawtlang mipuiin ramkang hi an thelh a.
Nizan hmasa dar 9:30 vel khan ramkang an thelh laiin Pu Khup Sian Sanga chu ramkang a thelhnaah chesualin lengkir, Feet 60 vel a sangah a tla thla a, a tlaknaah hian a luruh a sawh khi nia hriat a ni a, a lu-ah hliam na tak a tawrh bakah hian a hnungzang a sawh duk nasa hle a. Pu Khup Sian Sanga hi mi tlawmngaiten an inah an zawn haw nghal a, a hliam tawrh hi na viau mah se a tir lamah chuan a na lai te ala sawi thei a. Nizan hmasa dar 11:30 vel khan Champhai panpuiin nimin zinglam dar 2:00 vel khan a hliam tuar lovin Champhai District Hospital-ah a boral ta a ni.
Pu Khup Sian Sanga hian a nupui leh a fate 5 a kalsan a, a fate hi a upa ber kum 7 niin, a naupang ber hi kum 2 a ni a. Nimin chawhnu dar 1:00 khan an khaw thlanmualah vuiliam a ni. Ram kang hi niminpiah tlaia mimal ram hal, mit tawh ni-a an ngaih atanga rawn kang chhuak leh nia rin a ni.
Bialtu MLA Dr ZR Thiamsanga chuan Khup Sian Sang hi Rs. 10,000 in a ral a, ralna sum fai hi nimin khan MNYF Champhai North Block-I President KL Zairemmawia leh Block Secretary Lalherliana Fanai ten Ngaizawl khuaa an chhungte hnenah an hlan tih thu kan dawng.
Comments are closed.