TOMATO CHIN ATANGIN NUAI 100 CHUANG SUM LA LUT TAWH

Get real time updates directly on you device, subscribe now.

TOMATO CHIN ATANGIN  NUAI 100 CHUANG SUM LA LUT TAWH :
Nimin khan DHO Khawzawl leh Tomato Grower’s Association Tuipui tangkawp buatsaihin Comprehensive Middle School Tuipui tualzawlah ‘Tomato Kut’ hman a ni a. He hunah hian Prof F. Lalnunmawia, MLA, Vice Chairman, Horticulture Development Board chu khuallian niin, Tuipui khua mite Tomato tharchhuah chu hralh turin a vailiam a ni.  He hunah hian Dr ZR Thiamsanga MLA, Vice Chairman Health & Family Welfare Board chu khualzahawm a ni.
Khuallian Prof F. Lalnunmawia chuan  Tuipui  khua ten Tomato Kut an huaihawt hmasak ber  hmanpui tura an sawm chu vannei a in tih thu a sawi a. Mizoram in kan ei nasat tak Tomato hlawhtling taka Tuipui khuain a rah an seng thin  chu lawmawm tiin, Tomato mai bakah Tomato atanga siamt ei theih dangte siam kawngah tan lak angaih thu a sawi a. Sawrkar flagship program SEDP hmangin thei leh thlai tharte tihpuna theihtawp chhuaha intodelh tum ani tiin, State pawn atanga lakluh thlai tam takte titawp turin hmalak anih zel dawn thu a sawi a. Tuipui thar Tomato te Aizawl bakah Lungleia thawndarh ani chu lawmawm tiin, Mizoram  pum chawm thei tura tan la suah sauh turin a fuih a. Mahni kutkawih ngei hmanga   sum an lalut thin chu fakin, department lamin theihtawp a chhuahpui tur thu a sawi a. Thlai leh theite buaipui tham tharchhuah tum anih thu sawiin, pawl leh society anga an ding chuan sawrkar lam atanga tanpui kawngah awlsamna a siam dawn thu a sawi a. Tupui khjaw mite chu zirna ngaipawimawh tura chahin, zirna chu remhriatna siamtu anih angin eng hna pawh thawk ila a pui thei dawn a ni, a ti a. Prof F.Lalnunmawia chuan Tuipui khaw mite chu khaw intodelh leh entawntlak ni thei tura tan la sauh sauha, a let tam taka tharchhuah tihpun tum turin a chah a. Mamawh leh harsatna an neihte hotute hnena thlen thin tura chahin, a tul ang zela hmalak pui an nih tur thu a sawi bawk.
Khualzahawm Dr. ZR Thiamsanga chuan Sawrkar flagship program pawimawh tak SEDP hmangin intodelh thei tura hmalak tum niin, hemi atan hian horticulture department, agriculture department leh a kaihhnawihte chu an pawimawh hle dawn a ni, a ti a. Kuthnathawktute hmakhua ngaiin,  Sawrkar pawhin nasa zawka hmalak  a tum thu a sawi a. Tomato chingtute tan theihtawp chhuah pui a tum thu sawiin, ni chinchhiah tlak tak Tomato Kut  hman ani chu ropui a tih thu a sawi bawk.
Dr. Elizabeth Saipari, Director Horticulture Department pawhin thusawiin, Tomato kut hmasa ber tur hman ani thei chu lawmawm a tih thu leh kut hnathawh rah hlawhtling taka seng ani chu hmuh nuam a tih thu a sawi a. Horticulture chu eizawnna tlak leh sumdawnna tha tak anih thu leh Tuipui khuate  department hmalakna tipuitlingtu an ni chu fakawm a ti a. Hun bik nei thlai thenkhat a hun loh laia thar ani thei chu a  hlawkthlak hlea a hriat thu leh department hmalaknain Tomato leh Zikhlumte  off season a chin anih thu a sawi a. Hlawhtling taka Tuipui khuain  Tomato an thar thin chuan Mizoram hmun danga mite ti ve thei turin a fuih a ni, a ti a. Tomato chi tha natna tam zawk doa khawlum tuar thei tak Arka Rakshak-te ching tura pekchhuah anih thu  sawiin,  a chite chu Indian Institute of Horticulture Research ami lak niin nakum ami tur pawh kumin lamah chah vek tawh a ni, Horticulture Director chuan a ti a. Department-in a tih theih chenah engmah hmaih nei loin phur takin a hlen zel dawn thu sawiin, tomato chingtute chu Horticulture mi leh sate an ni tih inhre thar leha, department nen thahnemngai taka  thawhho zel puiah sawmin,  Tomato hmanga ei theih dang siam leh leitha siam dante  an zir duh phawt chuan training neihpui turin department chu zau taka an inhawn thu a sawi a.  Tomato chingtute duhsakna hlanin mamawh leh harsatna an neihte horticulture department a thlena thawhpui zel turin a chah nghal a ni.
Nimin Tomato Kut lawmna neih hma hian Khuallian, Khualzahawm, Official leh khawtlang hruaituten Bualpui Zau hmuna Tomato chinna hmun tlawhin a hmunah Tomato rah an seng a ni. Tuipui khuaah hian kum 2013 atang khan chhungkaw tlem tein Tomato an ching tana, kum 2015 khan KVK Khawzawl  chuan Arka Rakshak Variety a enchhin atangin a that duh zia hmuh ani a. Kum 2016 ah Tomato Grower’s Association in din niin, DRDA Champhaiin a kalpawhna kawng tha tak a sial sak a. Kum 2017 khan Horticulture Department-in hlawkzawka thar thei tura hma lain, Arka Rakshak mai bakah Arka Samrat Variety-te chin chhoh a ni a. Kumin 2019 hian tun thlenga thar tawh chu Grade A quintal 1200 leh Grade B quintal 480 niin, Rs 57,00,000/- an lei tawh a, chhungkaw 65 ten zau hrang hrang 5 ah Tomato an ching mek a ni. Kum 2017 atanga tun thleng hian Grade A quintal 3073, Grade B quintal 1229.2  thar tawh niin, heng zawng zawng atang hian Rs 1,59,38,000/- lei tawha chhianchhiah a ni. Tuipuiah hian ram hectare khatah Tomato quintal 50-80 vel leh kung khat zelah kg 2-5  thar anga chhut a ni a. Tuipui khuaah hian off season kan tih mai thal khawro leh fur ruahtui tam lai pawhin Lo ah ngei Tomato hlawhtling taka thar theih a ni a. Vawiina thar chhuah Tomato-te hi Arka Rakshak variety niin, pum khat hi gram 90-100 ani tlangpui a, ni 140-150 chhunga seng zawh hman thin niin, Hectare khatah Ton 60-80   thar theih a ni a. Arah hi a bial sawl deuh sen duk raih mai, tomato rah itawm tak niin,  kung khat atangin kg 18 thleng a thar theih a ni.
Nimin Tomato Kut lawmna hun hi Pu C.Rinsangpuia, VCP Tuipuiin a kaihruai a. Pu Peter Lalramhluna, HEO, Hqtrs-in technical report a pe a. Pu A.Lalnunkima, Chairman, Tomato Grower’s  Association, Tuipui pawhin thu a sawi a. Pu R.Lalremliana, DHO Khawzawl Division-in lawmthu sawina neiin hun a khar a ni. Tlaiah Tomato Kut lawmna ruaipui khawtlangin an theh nghal a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More