TUALCHHUNG VAWK HRI LAKA A HIM ZEL THEIH NAN RAMDANG ATANGA LAKLUH KAN HRIATTE THUNEITU HRILH HREH LO TURIN CHAH

Get real time updates directly on you device, subscribe now.

AH & Vety Department bultumin nimin khan AH & Vety Farmers Training Centre, Champhai-ah vawk vultute tan African Swine Fever chungchangah zirhona buatsaih a ni.
He hun kaihhruaitu Dr. B.Zonghinga, DVO Champhai chuan kum 1921 khan Africa ramah ASF an hmu chhuak a, a enkawlna damdawi a awm loh avangin, a vei zaa za thih theihna a nih thu a sawi a. Kum 2019 ah China-ah a leng tan a, a ramri hrul zawng zawngah lengin kum 2020 ah Burma a thleng a, Mizoram pawh hi kai nghal tura ngaih a nih laiin Covid-19 a rawn leng ta a; hei vang hian Vawk hri (ASF) lo lut turah kan him phah a ni, a ti a. Assam leh Meghalaya ah chuan ASF vang hian vawk thahnem tak a thi tih a sawi a ni. DVO chuan nikum March thla khan Bangladesh atangin Mizorama Lungsen khuaah a lo lut tih a sawi a. Champhai District a him viau laiin Zokhawtharah a lo lut a, vawk 129 an thi a; VC te nen tangrualin Bleaching sem a nih thu a sawi a. Bleaching hi vawk in tihfai na’n kar khatah vawi 3 tal hman thin tur a nih thu sawiin, hei hian nasa takin hri lakah a veng thei tih a sawi.
DVO Dr. B Zonghinga chuan Champhai District chhunga Afican Swine Fever lenna khaw 11 a awm tih sawiin heng khuaah hian ASF hri vangin vawk 547 a thi tawh tih a sawi a. Hri laka Champhai a him theihna tur chuan ram dang atanga vawk lakluh loh a tul thu sawiin, Vawk lakluh khapna hi Vawk vulhtute tan a ni a, Department in a khap avanga ngaihtha taka awm ngawt chi a ni lo, a ti a. Khua leh khua pawh vawk in leisak tawn khap a ni a, chu chuan nasa takin ASF darh zel tur a veng hle a ni, a ti.
Nilaini khan Mizoramah vawk 3 a thi leh a, vawk hri kai thi tur tho a ngaihte thahnem tak suat a ni tawh a; suat ni lova thi hi 29,686 an tling tawh a, Mizoram aia hri len hmasakna te chu ASF vanga thi ah hian kan khum vek a ni, DVO chuan a ti. Tunah chuan Champhai District-a Khua leh khua a vawk hralh chu phal a ni tawh a, vawk hralh chhuah phal a nih atanga kar hnih chhungin Nuai 60 man vel vawk hi hralh chhuah a ni a, vawk hralh tur te hi hri an kai leh kai loh endik hmasak zel a nih thu a sawi a. Vawk tamna Champhai District chu ASF vanga vawk thi tlem zingah a tel a, hei hi vawk vulhtute tan lakna vang chauh a nih thu a sawi a, sawrkar tih turah chauh dah lova tan la thar zel turin a sawm nghal a ni.
Dr. Lalrinhlui VO Trainer chuan vawk vulh dan tur chungchangah zirtirna a pe a. ASF Champhai in a kaina chhan ber chu Myanmar ni-a hriat a nih thu a sawi a.
Mizoramah Bangladesh atangin Lungsen ah hri hi lut ni mah se, Champhai bikah chuan Myanmar atanga rawn lut ngei ni-a hriat a nih thu a sawi a. ASF vanga vawk thi te dahna vawk in ah hian thla 3 atanga thla 6 chhung tal vawk dah tawh rih loh tur a ni, a ti a. Vawk vulh te’n chaw ningnawi an khawn thin a nih pawhin minute 30 tal hneh taka chhum thin tur a nih thu a sawi bawk.
Dr. Lalrinhlui chuan ASF hri hi PRRS ang tho in a insiam danglam zung zung thin tih a sawi a, hei vang hian a damdawi siam chhuah a harsa a, tun thlenga ASF Vaccine siam chhuah ala nih theih loh chhan a ni, a ti. Vawk hri kai te hi nasa taka an khua a sik thin thu sawiin, an beng a duk bakah an luak thin a, ASF a nih leh nih loh hriat vat theih turin mithiamte hriattir vat thin tur a ni tih a sawi. Vawk man a tlawm tih vanga lei ngawt chu thil fuh ber a ni lo tih sawiin, hriatchian ngei chu to deuh mah se lei ngei hi a him bik tih a sawi a, khawlaia vawk zuar kualte leisak loh hi a him ber tih a sawi bawk.
Dr. Lalrinhlui chuan Mizoramah ASF vanga vawk thi tam vak tawh lo mah se inring renga awm a ngai tih a sawi a. Vawk vulhtute chuan ram dang atanga vawk lalut an hria a nih chuan thuneitute hriattir zung zung turin a chah a, dan phal loha vawk lalut lui te chu hmaizah an ngai lo tih sawiin, vawk vulhtute chu ram dang atanga vawk lakluh te thuneitute hnenah hriattir zel turin a sawm nghal a ni.
ASF chungchanga training neih zawhah hian Champhai District Vawk Vulh Association hruaitu thar thlan nghal a ni a, Chairman atan F.Lalbiakmawia, Vice Chairman atan R.Lalchhuanawma, Secretary atan J.Lungmuana, Asst. Secretary-ah F.Lalrinawma, Treasurer-ah Dawngsuanpauva leh Fin. Secretary ah R.Vanlalsiama te thlan an ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More