TUIKHAWHTHLA FEET 423 A SANG

Get real time updates directly on you device, subscribe now.

Champhai District Bawrhsap Maria CT Zuali chuan Tualcheng rama tuikhawthla, Metre 129-a sang, Lungno Khawhthla a tlawh a; khualzin hip thei tur leh a hmun hma te tlawh a nawm leh awlsam zawk theih dan tur a enfiah.
Tualcheng rama tuikhawhthla ‘Lungno khawhthla’ san zawng hi an teh dan chuan metre 129 a sang a ni a, khualzin hip thei tur leh a hmun hma te tlawh a awlsam zawk theihna turin cheibawl mek a ni a. Lungno khawthlah chungah hian metre 70 vel zeta sang Tuikhawhthla a la awm bawk.
Rural Infrastructure Promotion Fund Project (RIPFP), NABARD leh Champhai RD Block tangkawp ten Tualcheng rama tuikhawhthla, sang leh mawi tak, Lungno khawhthla panna kawng, PCC Pavement leh a thlirna chawlhbuk, Viewing Gallery siam a ni a. Champhai District Bawrhsap Maria CT Zuali chuan Nilaini khan Tualcheng rama Lungno khawhthla hi tlawhin, Champhai District chu sik leh sa nuam tak a nih bakah hmun mawi tak tak, khualzin hip thei tam tak awmna a ni chu vanneihthlak a tih thu a sawi a. Hmunhma mawi leh cheibawl tlakte chu dimdawi taka enkawla khualzin hip thei tura chei thata humhalhna chang hriat a tul tih a sawi a. District mawi bik, nakin lawka khualzin hip thei tur, sum leh pai lakluh theihna tur hmunhma hrang hrangte chu ngaihhlutna chang hria a, neitu thinlung pua vawnghim tlat turin District mipui a chah a ni.
Tualcheng ram chhunga awm Lungno khawhthla panna kawng leh a thlirna chawlhbuk siam nan hian RIPF NABARD Grant Assistance Rs. 5,00,000/- leh Champhai RD Block atanga Rs.30,000/- , avaiin Rs. 5,30,000 ruahman a ni a. June ni 28, 2021 khan hna thawh tan niin, tun thla September ni 28, 2021 khian zawhfel hman tura ruahman a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More