TUIPUIRAL ZIRLAI PAWL TEN ZOPUIPHUL HMUN CHHUICHIANG TURIN LOKAYUKTA NGEN

Tuipuiral Zirlai Pawl’in NEC sum ₹ Nuai 359.21 hmanga siam Samthang Zopui Phul Nature Park, Project chungchangah thil dik lo lian tak, eirukna nasa tak a awm ngei nia an hriat thu sawiin, He hna hi a nih tur ang a nih loh nasat thu te, hnathawh tura ruahman thawh zawh a nih hma leh bungraw awm tur pawh a la awm kim hma a, DC Office Champhai atanga Completion Certificate pek chhuah a ni chu a chhan chhuichiansak turin Lokayukta an ngen a.

Tuipuiral Zirlai Pawl chuan Samthang Zopui phul nature park chu Earthwork thawh tur engngemaw zat awm siin Forest clearance lak a ni lo tih sawiin, He project atana sum ruahman ₹ Nuai 359.21 chu C/MPWD manual/norms ang chuan DC Office, Champhai chu hnathawk turin an tling lo tih an sawi a, heti chunga DC Office Champhai chu implementing agency a ni thei chu mak an tih thu sawiin chhui chiansak turin Lokayukta hi an ngen bawk a ni.

Tuipuiral Zirlai Pawl chuan bungraw awm tura tih a la kim lo nasa hle tih an sawi a, heng bakah hian A panna kawng te, Eco toilet, Eco Cafetaria te chu DPR nen inmila thawh a awm meuh lo niin an sawi bawk.

Samthang Zopui phul management Committee-in sum chuang bang atanga hna thawh an sawi-ah thil fel tawk lo a awm tih Tuipuiral Zirlai Pawl chuan sawi bawkin ‘Transformer bunna tanga ₹ nuai 8 hmang anga an insawiah ZEDA atang bill an hmuhah ₹ Nuai 2 a nih thu an sawi a, Chhungkaw pakhat hnena ₹ Nuai 3 zangnadawmna pek anga an insawiah a dawngtute’n ₹ Nuai 1 leh Sing 5 chiah an dawng” tih an sawi a. Retaining Wall siamna atanga ₹ Nuai 3 hmang anga an insawi-ah ₹ Nuai 1 leh Sing 5 chiah an dawng niin an sawi bawk a, Dressing Road MNF thalaiin an thawhah ₹ Nuai 3 hmang anga sawiah ₹ Nuai 1 chiah dawn a nih thu an sawi bawk.

Tuipuiral Zirlai Pawl chuan Tender chhuah a ni lo te, Forest Clearance lak a ni lo te leh GST chhun a ni lo te chu thil mak tak a nih thu sawiin, he hnathawhnaah hian thil inthup tam tak a awm ni ngei nia an hriat thu an sawi bawk.

Samthang Zopui phul hi NEC Fund ₹ nuai 359.21 hmanga sak niin kum 2021 April thla atangin bul tan a ni a, kumin February ni 25 khan khatih hun laia Champhai DC Pi Maria CT Zuali chuan a hawng a, Ferbruary ni 25-a DIPR Mizoram tarlan danin Project kentel langsar zingah hian Aproach road, Dilpui tuikhuah leh lenvelna lawng, chhungkaw 6 tan homestay, Eco toilet, Log Cabin, Eco-Cafeteria, Camping & hiking equipment, Orchid house and propagation centre leh Bazar shed-te siam a ni

Get real time updates directly on you device, subscribe now.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More