Champhai District chhunga Registrar of Marriages Training Nei
Thawhlehni (28/4/09) khan Champhai District chhunga Registrar of Marriages ten I&PR Conference Hall, CHANEM building-ah Inneihna chhinchhiah dan tur chungchang training an nei a. Champhai DC Pu TV.Fambawl chu khuallian niin he hun hi a hawng a ni.
Khuallian chuan thusawiin vawiina training te hi dinhmun sang taka dingah in inngai lo mai thei a, mahse in hna thawh tur hi hna pawimawh ber a ni a. Hmasawnna lungphum phumtu in ni, a ti a. Registration of Marriages chungchang hi kum 2007 khan Mizoram Legislative Assembly chuan a lo passed tawh a. Governor-in a pawmpui hnuah April ni 1, 2008 khan Dan a hman theih turin Notification chhuah a ni a. Mahse he dan hi hman loha a awm reng laiin Supreme Court chuan India ram pumah February 2006 atanga innei zawng zawngte chhinchhiah vek turin a ti a. Chuvang chuan dan kan lo neih sa hi a taka hman theih turin tunah hian hmalak zui a ni ta a ni. Mizote kan inneih hian Kohhran Danin kan innei a, mahse harsatna kan tawhin kan inneihna min hriatpui hauh lotu Court-ah kan zualko thin a. A tawpna chu Court-ah hian a ni zel a ni. Chuvangin kan inneihna te hi sorkarin a hriat vek zel a ngai tawh a. Vawiina training te hi kan mawhphurhna a sang a, ram leh mipuite tan hna in thawk a ni tih hre reng ang che u, a ti.
He huna zirtirna petu, Law & Judicial Department-a Deputy Secretary leh Joint Registrar, General of Marriages ni bawk Pu Zahmingthanga Ralte chuan, Innei tharte reng reng chuan an inneih atanga thla khat (Ni 30) chhungin in hnenah an rawn in report vek tur a ni a. Form B copy hnih (2), copy khat Rs. 10 zelin an lei ang a. An form lakchhuahah hian inneih thlalak emaw, passport size thlalak an bel ang a, chu chu hming an ziah hnan ang a; thuhretu mi pakhat ve ve an nei tur a ni. A dik ngei a ni tih in finfiah hnuah Register-ah in ziaklut ang a, Marriage Certificate in pe chhuak ang. Marriage Certificate hi chu a thlawna pekchhuah tur a ni ang. Chhan tha tawk tak avanga ni 30 chhunga in report hman lo te chu ni 90 (thla 3) chhung in nghak thei a, Rs. 100 an chawi ang. Hemi hun chhunga an la tifel lo cheu a nih chuan thla tin Rs. 50 an chawi ang a, mahse an pawisa chawi hian Rs. 1000 a pel tur a ni lo. Innei thar, in register lo te chu Dan angin thla ruk (6) thleng Lung in tan leh Rs. 1000 thleng chawi tir theih an ni, a ti bawk.
Pu Zahmingthanga chuan he dan tangkaina tur thenkhat tarlangin kum 18 tling chin chauh register theih an ni a, hei hian naupang lutuk innei tur a veng ang a, nupui pasal pakhat aia tam a ruka neih a veng bawk ang. Kohhranin inneih certificate min pek thin hi Embassy, Defence Ministry leh Court in a pawm lova. Tuna kan Dan hman tur hi chu sorkar pawmpui a ni tawh dawn a ni. Khaw tina Registrar of Marriages te hi inneihtirtu in ni lova, inneite chhinchhiahtu chauh in ni, tiin training te hi a hrilhfiah bawk. He thil hi Mizoram mai ni lo, India ram pum huapa thil thar a nih avangin thil kaltawh chu hriatthiamna neih a ni ang a. Tun atang erawhchuan inhriatthiamna a awm tawh dawn lo a ni. February 2006 hmaa inneite tan erawhchuan registration hi a ngai lo tih a sawi a. Tuna Registrar of Marriages hi training pek an nih atang hi chuan he Dan hi khauh taka lekkawh a ni tawh dawn a, a zawm turin mipuite pawhin an rilru an siam nghal a ngai a ni, a ti.
Nimina Inneihna chhinchhiah dan tur chungchanga training-ah hian Pu R.Vanlalena, MJS, Magistrate 1st Class, Champhai chuan lawmthu sawiin a khar a. Champhai district chhunga Registrar of Marriages atana ruat, khaw hrang hranga mi zirtirtute an kal tha hle a ni. Hetiang trainng hi district dangah pawh kalpui mek a ni bawk.
======================================
Jubilee denchhenin khaw chhung thianfai
Govt.GMHSS chuan an school kum 60 tlin lawmna chikhat atan Champhai khawpui phiahfai hnatlang ni 27/4/09 khan an buatsaih a. Hawnna inkhawm tawi Pu C.Lalthuamluaia, Principal, Govt. GM HSS kaihhruaiin Kahrawt Field-a neihah Pu H.Lalchhuanawma, DLAO chu khuallian niin he Cleanliness Drive hi a hawng a ni. Pu C.Lalthuamluaia chuan thuhma sawiin, tuna an school-in kum 60 an tlin lawmna chikhat atana khawpui chhung thenfai hna an thawk hi Champhai khawpui tawp leh balh vang lam ni lovin mitin ten faina lama hma kan sawn zel theihna tur atana ti an nih thu a sawi a ni. Hawnna thu sawiin Pu H.Lalchhuanawma chuan Faina kawnga Govt. GMHSS zirlai leh zirtirtu ten hma an la thei chu fakawm a tih thu sawiin lawmthu a sawi a. Faina hi a pawimawh em avangin hetiang lama India rama hmalatu hmasa leh a ching chhuaktu Mahatma Gandhi chuan Bible-a Isua zirtirna thu pakhat ‘Fai hi Pathian dawta pawimawh a ni’ tih thu hian a rilru a hneh hle thin a. Chuvangin hemi kawngah hian hma a la thin a, amah pawh a faiin faina hi a ngaipawimawh thin hle a ni a ti a. Chuvangin faina hi hriselna min thlentu kawng pawimawh a nih avangin mitin hian kan ngaih pawimawh a tul a ni a ti. Khuallian hian zirlai leh zirtirtu, khawchhung thenfai hna thawk turte thingpui inna atan Rs. 5000 a pe nghal a. Hawnna inkhawm neih hnu hian zirlai leh zirtirtu kalkhawmte chuan khaw chhung hmun hrang hrang thianfai turin an thawk chhuak nghal a ni.
=========================================
P&E EE-in tui pump-naa harsatna sawifiah
Pu L.Pachuau, Superintending Engineer, Champhai Power Circle, Champhai chuan Power & Electricity chungchangah mipuite hriat tur hetiang hian thuchhuah a siam –
Mizoram Sorkar-in Department hrang hrangtte hna chanpual a siam Allocation of Business Rules – 1987 letter No. J.12011/11/87-POL Dt. 20.2.1987-ah chuan Power & Eletricity Department chuan power siamchhuah leh thawn chhuah bakah a semchhuahna te leh Electric tha chakna mipui chhawr tura siamna reng reng a thawk tur a ni tih a ni a.
Sorkar lehkha B.20024/3/2000-P&E of 31.5.2002 ah chuan Mizoramah 650V aia sang thawk thei electric licence contractor an la awm loh avangin 650V aia sang thawh tur neite chuan Power & Electricity Department hnenah an sawi hmasa tur tih a ni a, hetiang 650V chunglam contractor an awm loh chuan midang ruai lova Power & Electricity Department thawh tir tur a ni.
A chunga lehkha pahnih tarlan te khi Chief Minister, Minister zawng zawngte leh Department Head zawng zawngte pek vek an ni a. He hi department zawng zawngin hre tura ngaih ni mah sela lo la hre lo emaw lo hre tawhlo an awm niin a lang a. Chuvang chuan Champhai Water Supply-ah pawh tlem harsatna Official Procedure a lo awm ta a ni.
Champhai Water Supply hna hi a a vaiin IPI hnenah pek a ni a, anni hi electric contractor an nih loh avangin an Sub-Station chu PSC Engineer Pvt. Ltd. hnenah an pechhawng veleh a. Hemite hi West Bengal chhung atana thawk tura West Bengal Licensing Board atanga licence nei an ni a, Mizoram atan approved an ni lova. Chuvangin hemite hi Mizoram Electrical Licensing Board in thawh phalna an pek ve phawt a ngai a. Chu chu a chhawrtu ten emaw anman\hniin emaw an buaipui tur a ni. Mizoram Electrical Licensing Board hian phalna a pek hnuah an hnathawh chu pek ngam a ni em? tih Electrical Inspectorate, Zuangtui-Aizawl ten an endik leh phawt tur a ni. Heng hi tihfel a nih hma chuan Power & Electricity Department hian electric a pe ngawt thei lo a ni. Tin, PHE Sub-Station siamtute Test Report chu Inspectorate lamin a endik hnuah Power & Electricity Department, Champhaiah an thehlut leh ang. Office Record-ah mumal taka ziahluh leh vek phawt tur a ni.
Tin, Champhai atanga Tuipui Pump House thleng hian 33KV Line siam a ni a, he hna hi 2001 vela thawh zawh tawh niin, 2006 khan 11KV a charged chauh a ni a, kum rei tak a lo awm tawh avangin 33KV a charged ni ta sela a la rintlak ang em? tih erawhchu test phawt loh chuan hriat theih a ni lo. He 33KV Line hi PHE Department atanga pawisa Power & Electricity Department in an rawn chhuhluh hmaa thawh a ni a, chuvangin a neitu pawh PHE Department an ni a, a chhat a thatah leh siam thatnaa sum pai ngai a awm pawhin Power & Electricity Department ni lovin PHE Department in an tum zel tur a ni.
A chunga tarlan te kh tha fel vek mahse Mizoramin power a dawn tlem thin avangin Mizorama power semdarhna lama thuneitu State Load Despatching Centre (SLDC) ten Champhai tana power an rawn bithliah zat pawh hi pun a ngai ngei ang. Hemi tipung tur erawhchuan pump neitute hnen atangin an power mamawh zat Power & Electricity Department in dilna a dawn phawt a, SLDC hnena a zuk dil belh ve a ngai leh a ni.
================================================
Scheme thar
Mizoram Cooperative Apex Bank chuan anmahni dawrtute tana hamthatna turin LIC nen tangkawpin Life Insurance Scheme thar an siam a, he scheme tharah hian kum upat dan bithliahin kum khat chhung sum tlemte dahin hemi chhunga lo boral palhte chu an chhungten Rs.50,000 an la chhuak thei dawn a, pawisa dah tur zat Rs.117 leh Rs.750 inkar a ni. Hrechiang duh chuan Apex Bank-ah zawhfiah theih a ni e.
===================================
UPC Crusade
Thawhtanni (27/4/09) atanga ningani (30/4/09) thleng Mizoram UPC chuan Venglai Community Hall-ah Live Crusade an nei a, zantin thusawitu hrang hrangin thupui hrang hmangin thu an sawi thin.
===================================
Thalai camping
Vengthlang North Kohhran chuan zaithiam R.Lalbiaksanga ruaiin Thawhlehni atang khan thalai kum 12 atanga kum 18 inkar tan camping an buatsaih a, mi 170 chuang Camp ah hian an lut a, an kohhran pawn atang pawhin Camper an awm nual.
======================================
Ramri khar rih
Ni 28/4/09) atang khan Myanmar atangin Mizoramah bungraw phurh luh khap a ni a, he khapna thupek hi thu leh awm hma chuan kenkawh a ni ang. Champhai SP Pu C.Lalthanmawia sawi danin Myanmar leh Mizoram inrinaa venhimna leh dan leh thupek kenkawh chungchangah thil chin fel tur a awm avangin hemi hun chhung hian Myanmar atanga Zokhaw-thar kal tlanga bungraw phurh luh khap a ni a, he khapna hi thu leh awm hma chu kenkawh a ni ang.
==========================================
Hnahlanah Aircel
Aircel chuan Hnahlan-ah Tower an tihnun leh tak avangin helam tlangdungah hian Aircel hman theih vek tura beisei a ni. Tunlai hian Aircel hian non-stop connection Rs.30-in booking an hawng mek a, booking tite hnenah movie soundtrack audio CD a free-in vawiin atangin an pe chhuak tel tawh dawn bawk a ni.
========================================
Cong. thalaiin phal lo
Tunlai hian Champhai District chan tur buhfai chu mi thenkhatin Aizawl lamah an phur thla thin a, sumdawnnan a hmangin, hei hi Champhai South Block Congress thalaite chuan thalo an ti a, hetiang ti thinte chuan ti tawh lo turin an ngen a, ti lui leh an awm chuan thu neitute hnenah hriattira hmalak zel an tum tih thuchhuah siamin an tarlang.
=============================================
Inbuatsaih nasa
Central YMA buatsaih in Ni 5-8.5.2009 chhung hian Aizawl-ah YMA Sports 2009 Final Round neih tur a ni a, Football, Volleyball leh Athletics Items-a Sub- Hqrs. YMA aiawha kal tur Branch hrang hrangte pawh an inbuatsaih nasa tawh hle a ni.
========================================
EM atan ruat
Tunhnai khan Dr Aichhunga chu MPCC Executive Member atana ruat thar a ni.
=======================================
Heroin man
Ni 28/4/09 chawhnu lam khan Champhai Excise Vengthlang YMA Security Cell tangrualte chuan Vengthlangah Zothan-sangi (Buangi) kum 53, D/o Chhunthuama (L), Zokhawthar hnen atangin Heroin gram 5, penicillin bur 9 an man sak bakah Duhcheri (64) D/o Thanghleia (L), leh a fanu Hmangaihzuali, Electric veng hnen atangin piece 2 an man sak bawk a, Duhcheri te hian Excise hmuh lai hian chhin sen 1 an paih darh hman a ni.
===========================================
Volleyball tan ta
Thawhlehni (28/4/09) chawhnu dar 1:00 atang khan Champhai District Volleyball Association buatsaih Inter Departments Volleyball Competition chu Kahrawt Field-ah khelh tan niin he Competition hi DC Pu TV Fambawla’n a hawng.DC chuan Office hrang hranga thawkte tana Infiamna hmanga inhmelhriatna tur Inter Office V/ball tournament buatsaih a ni chu lawmawm a tih thu leh Volleyball chu inelna thianghlim a nih thute tarlangin,he tournament hian sorkar hnathawkte zingah inhmelhriatna leh inunauna tha tak a thlen a beisei thu a sawi. He Competition-ah hian team 24 lai lutin league system-a khelh tur a ni.
===============================
Polytechnic hmun tur
Thawhlehni (28/4/09)khan Higher & Technical Education Deptt. Joint Director Pu Keuva chuan Champhai lo thlengin tukin zing kar hian Champhaia Polytechnic hmun tur DC hovin an enkual dawn a, Kanan Veng an en hmasa ber dawn a ni.
-=================================
Training nei
Champhai vela Anganwadi Worker ten nilaini leh ningani (29-30/4/09) khan Venglai Community Hall-ah training an nei.
===============================
Innei
Ningani (30/4/09) chawhnu dar 2:00 hian Tv. Malsawma Zahau S/o Hmunmawia, Vengthlang leh B.Lalhmangaihzuali D/o B.Vanchhuanga, Armed Veng, Aizawl te chu Vengthlang Presbyterian Biak Inah Kohhran Dan Thianghlimin an innei dawn.
Zirtawpni (1/5/09) chhun dar 11 ah Tv.C.Hrangkunga S/o C.Sangtuala Venglai leh Lalchhanhimi d/o PC.Lalhmingliana Bethel Veng te chu Venglai Kohhran Biak inah Kohhran dan thianghlimin an innei dawn.
========================================
Fam chang
Pi Zamliani (76) Pu Ralzinga Hnamte nu, Hmunhmeltha, thisen sang vangin nilaini (29/4/09) zing dar 9:40 khan a boral a, chawhnu lamah Hmunhmeltha thlanmual ah vuiliam a ni.
====================================
2nd atangin 1st Div-ah
Electric SC leh Kahrawt SC te chu CDFA First Division ah an kai thar ta.Tunah hian 2nd Division Screening tournament neih mek a ni a, heng team hnihte hian Final lutin Ist Division ah an kai thei ta a ni. Karleh Thawhtanni (4/5/09) chawhnu dar 2 ah Final khelh a ni ang. Club lian Vengthlang SC chu First Division-ah an la inhlangkai zo lo.
=====================================
Tui pump tam thei dawn
Greater Champhai Water Supply Scheme a taka hnathawk thei tura mutan lian tak Power supply chungchanga harsatna sukiang turin chak taka hma lak chhoh mek zel a ni. S.E. Pu C.Chawnghnuna sawi danin Tuipui lui kama Transformer bun zawh tawh leh a Line te chu Power department a endiktu pawlin ningani (30/4/09) khan an endik ta a, Inspection neih zawh a nih tawh avangin karleh lam atang chuan Transformer hi charge theih beisei a ni a, Power pek thlak fel a nih hunah chuan tui tam zawk pump chhuah theih a ni ang a, mipui hnenah pawh hnianghnar zawka tui pek theih beisei a ni bawk.
=======================================
Comments are closed.