UPA TE NI HMANG

Get real time updates directly on you device, subscribe now.

Upate Ni Vawi 23 na chu Khuangthing Branch Upa Pawl te chuan nimin khan an lawm.
MUP Day hi Khuangthing Community Hall-a hman niin, Khuangthing Doctor Lalhmingsanga chuan khuallian niin a hman pui a. Dr Lalhmingsanga chuan kum Upa te hi Mizo te min thuam mawitu leh kan ro hlu in ni a, chuvang chuan an hrisel nan an taksa pawh an vawn uluk a pawimawh tak zet a ni, a ti.
Khuangthing MUP Branch ah hian member 162 awm mekin, kum 2020 – 2021 chhungin member 10 an boral a, sunna hun hman nghal a ni bawk. Nimin an Day lawm naah hian Vawk talhin tlai lamah ruai an theh bawk.
Samthang Branch MUP te chuan nimin khan Upa Sangthuama kaihhruaiin Upate Ni pual hian hun an hmang a. MJA Champhai District President Lalhmingmawia Pachuau, CCN neitu ni bawk chuan khuallian niin a hman pui a.
MUP Champhai Vengthar Branch chuan raltlan chhawmdawl nan veng chhungah vehbur an khawn sak a. Thawmhnaw leh mutbu thahnem tak bakah Cheng 17,000 leh buhfai ip 2 an khawn khawm sak a ni.
Neihdawn Branch MUP chuan Ningani atang khan hun hmang tanin khaw chhung tifaiin an hnatlang a.
Nimin zing khan kawng dunga thing phun te an tifai leh a. Chhun lamah Pathian faka zaiho lehin, Pi pu zai hmang te a intihlimin hun an hman chhunzawm a, tlai ah chawhlui an kilho nghal a ni.
Upate ni hi Kum 1991 atangin khawvel pumah hman tan a ni a. Mizoram ah pawh upate ni hi kumtin hman thin a ni. MUP Champhai District Hqrs. pawhin he ni hi urhsun takin an hmang thin a. Kuminah erawh District Hqrs. anga hmalak hi hripui leng vangin tih theih a ni lo va. Mahse Branch mal angin mahni theih ang ang a hun hman a ni a, khawlai tihfai leh tanpui ngai te tanpuina hun atan hmang hlawm a ni.
Kumin hian upate ni pualin thupui ‘Tunlai thiamna mitin tan’ tih hman a ni a. MUP Hqrs. President C. Roliana thuchah chu branch hrang hrangte chuan anmahni remchan angin an chhiar chhuak a. MUP Champhai Dist. Hqrs. chuan an huam chhunga area leh branch te lungrual leh tha taka thawkho zel turin duhsakna an hlan a ni. Champhai District-ah hian MUP Area 11 leh Branch 63 an awm mek a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More