VANGPUI KÛT 2022 ROPUI TAKIN HMANG

Ngur Vengsang Branch YMA buatsaiha Vangpui Kût 2022 hman mek chu nimin chawhma dar 10:30 khan Health & Family Welfare Board Vice Chairman Dr. ZR Thiamsanga, Champhai North bialtu MLA chuan khuallian niin a hmanpui a, Vangpui Kût pual lawpuina thilpek pawisafai Rs. 10,000 bakah Volleyball leh net-te a hlan.

Khuallian Dr. ZR Thiamsanga chuan hrileng vanga kum hnih dawn nunphung a khaihlak hnua Vangpui Kût lawmna hun hlimawm tak hman a ni thei chu lawmawm tiin, hmanpui tura sawm a ni chu thinlung taka a lawm thu a sawi a. Kûtpui hman mek chu mi zawng zawngte hlimna hun leh thlei bik awm lova hlim leh lawm taka hmanho tur a nih thu sawiin, khawtlang mipuite chu Kût hlimawm tak hmanga inpawhtlanna leh thawhhona tha zawk siam tum turin a chah a ni.

Champhai North bialtu MLA chuan Ngur Vengsang Branch MHIP In leh Vengsang Branch YMA Football Ground tihpuitlin a nih theih nan theihtawp chhuah a nih tur thu a sawi a. Ngur khua chu a bial chhunga Model Village atana thlan a nih thu leh hmasawnna hna thawh kawngah theihtawp chhuah thin a nih thu a sawi a. Sikul leh Sub-Centre a thawktute pawh ngaaihtuah hmasakah neih thin a nih thu tarlangin, hun reiloteah tui harsatna pawh chinfel thuai tum a ni, a ti a. Ngur tlang cheibawlna tur leh Nauban Park siamna tur atan sum ruahman a nih thu sawiin, a mawina leh nihna angte hlauh chuang lovin lenkhawthawnna leh intihhlimna hmun nuam tak siam tum a ni, a ti a. Land Development kaltlangin Ngur-ah hmalak tum a nih thu a sawi bawk a. Khawtlangin sawrkar hmalakna hrang hrangte tha taka an tawiawm thinnaah lawmthu a sawi bawk.

He hun Ngur Vengsang Volleyball Court-a hman hi Pu Nangkhuala, Ngur Vengsang Branch YMA Vice President chuan a kaihruai a. Upa PK Zama Suante in hunserh a hmang a. Zai, lam leh rimawite ena ngaihthlak a nih bakah intihsiakna hrang hrang neih chhunzawm a ni.

Ngur Vengsang Branch YMA buatsaih Vangpui Kût lawmna hi October ni 5 zan atanga neih tan niin, nizan khan YMA Hall-ah kharna hun hman a ni. Kût hman chhung hian thu leh hla hmangte leh infiamna hrang hrang hmangtein intihsiakna buatsaih a nih bakah Zirlai tithate chawimawi an ni.