Road Protection Squad chuan nimin khan Champhai khawpui chhung an endik chhunzawm.
Champhai District chhunga lirthei che vel leh mihring an him theihna tura Champhai District Magistrate-in September Ni 21, 2020 a thupek a lo chhuah tawh bawhzuina kalpui zelah nimin chawhnu khan Road Protection Squad Committee Champhai chu an Chairman Lalnunfela Chawngthu, Sub-Divisional Magistrate hovin an thawkchhuak a. New Champhai, Zion Veng leh Bethel Venga kawngpui nekchep zawnga hmalaknate an endik a, dan palzut mante insenghawi tura hriattirna pek an ni.
Nimin Road Protection Squad-te endikna kalpui hmang hian kawngpui neka in sa, leivung paih, double parking leh bungraw hungte la sawn tura hriattir niin, mi 2 hnenah hun bi tuk chhunga insenghawi tura hriattirna lehkha pek a ni.
Road Protection Squad Committee Champhai chuan vantlang tana hnawk leh kawngpui dal zawnga hmalate hnenah a rang lama seng hawi tura hriattirna pein a tul angin hma a la thin a.
Nikum leh kumin chhung khan Champhai khawpui chhung hmun hrang hrangte fangkualin an lo endik tawh thin a ni. A remchan dan ang zelin veng hrang hrangte fangin, khawtlang hruaitute nen endikna hna hi an kalpui chhhunzawm zel dawn a ni.
Comments are closed.