VAWK 4000 CHUANG CHAN TAWH

Get real time updates directly on you device, subscribe now.

Champhai District-a African Swine Fever leng mek chu nikum aiin a darh chak lo niin AH & Vety Dept-a a viltute chuan an an sawi.
AH & Vety Dept-a African Swine Fever leng mek viltute chuan, nikum November thlaa ASF leng leh kumina leng khaikhinin, hri inkaidarh hi a chak lo zawk a; he natna avanga vawk damlote chu an damrei deuh zawk tih an sawi.
Hetihlai hian Champhai District-a he hriin vawk farm a luhchilh tawhah chuan dam chhuak an awm meuh lo va, a natna hrik hi a chamrei theih avangin fimkhur a tul hle, an ti.
Tuna Champhai District-a ASF rawn leng thar leh hi dan zawm lova Myanmar atanga vawk lakluh leh vawk thi paih fimkhur loh vanga rawn intan nia sawi a ni a. A darh chhanah hian Champhai District khaw thenkhata vawk vulhtute chuan, Myanmar nena inkalpawhna leh vawk emaw vawksa lam chi lakluh vangah an puh a. Vety doctor te chuan ASF hian pudarhtu a mamawh tih an sawi ve bawk.
Mizorama ASF leng hi Selesih-a Vety College-ah nikum khan a genome sequence neih a ni tawh a. ASF gene an dahkhawmna nena en milin China-a leng thin leh Mizorama leng chu a inang lo tih hmuh chhuah a ni a. Bangladesh leh Myanmar-a leng thin nena khaikhin turin ram pahnihte hian data an neih loh avangin khawii zawk atangin nge a lo luh tih chu finfiah theih a ni lo.
Vety department hian vawiin thlengin he hri laka a invenna tur, bleaching solution chu vawk vulhtute hnenah an sem chhunzawm zel a. Tuna an sem lai hi Champhai South bialtu MLA TJ Lalnuntluanga’n vawk hrileng dona atana a leisak leh department-in an lei a ni.
Hetih lai hian African Swine Fever leng thar leh avang hian Champhai District chhungah nimin khan hmun 7-ah Vawk 23 an thih belh leh a.
Farkawnah 8, Khawbungah 4, Electric Veng leh Zote-ah 2 ve ve, New Champhai leh Hmunhmeltha-ah 1 ve ve an thi bawk a. Nimin khan Vawk 46 suat belh leh a ni bawk.
Champhai District chhunga Vawk pul hri tuar nasa ber Farkawn-ah chuan ASF kaihhnawih vangin Vawk 1,747 chan tawhin, Vawk 575 a thih bakah 1172 suat a ni tawh a. Champhai khawpui chhunga ASF tuar nasa ber Bethel Vengah Vawk 223 thitawhin Vawk 39 suat a ni tawh bawk.
ASF hri leng thar leh mek hian Champhai District chhunga khua leh veng 27 te luhchilh tawhin, Vawk 2032 thi tawhin, 2186 suat a ni tawh bawk a. ASF kaihhnawiha Vawk chan zat hi 4,218 a tling tawh.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More