VAWK HRI AVANGA BANK LOAN LA TE HARSATNA SAWI KHAWM

0

Get real time updates directly on you device, subscribe now.

Nimin chawhma dar 11 khan Special District Consultative Committee (DCC), Champhai chu an Chairman Pu James Lalrinchhana, District Bawrhsap hovin an thukhawm a. He hun hi Pu Rakesh Ravi, Regional Manager (RM), SBI chuan a telpui bawk.
District Bawrhsap Pu James Lalrinchhana chuan meeting neih a nih chhan tlangpui tarlangin, ASF hrileng avanga bank loan la a Vawk vulhte harsatna engtin nge kan bawhzui ang tih ngaihtuah tura thutkhawm pawimawh koh a nih thu a sawi a. District level meeting pawimawh tak special DCC meeting-a kohte chu mawhphurhna lian tak nei, mipuite hmasawnna tura pawimawh tak an ni tih inhre thara, thutkhawm koh leh hmalakna tura relte ngai pawimawh turin a chah a. Mipui tana rawngbawl tur leh an hmakhua ngaihtuaha tha taka thawhho a tul thu sawiin, inpawhtlang takin infinchhuah chung zela kan kal thiam a tul a ni, a ti a. Bank thawktute chu mipuite hnenah bank dawr leh bank kaltlanga hamthatna an dawn theihte zau zawka zirtirna uar zawka kalpui turin a fuih nghal bawk.
He hun telpuitu SBI Regional Manager Pu Rakesh Ravi chuan Bank-te chu Customer Service tha tak pekchhuah ngaipawimawh tura chahin, mipuite leh tanpui ngaite pui tur kan nih angin theihtawp kan chhuah tlan a tul a ni, a ti a. ASF vanga Vawk vultuten harsatna an tawk chu pawi a tih thu leh a tawrhpui thu sawiin, bank kaltlangin dan an neihte tlawhchhanin tanpui dan ngaihtuahpui a tul thu a sawi a. Bank kaltlanga Sawrkar scheme kalpui thinte zau zawka puandarh kawngah theihtawp chhuah turin banker-te a sawm nghal bawk a ni.
He hunah hian Dr. B.Lallawmsanga, DAH&VO hnen atangin ASF darh zel tur ven leh hemi kawnga hmalaknate ngaihthlak a ni a. Veterinary Officer Dr. Lalrinhlui hnen atangin Champhai District dinhmun tlangpui ngaihthlak a ni a, Champhai District chhungah kum 2021 leh 2022 ah Vawk hrileng a awm thu leh thawhkhatna leh thawhhnihna ti a vuah a nih thu a sawi a. Tunhnaia ASF vanga Vawk suatte hnena zangnadawma Sawrkarin a pek hmasak chu kum 2021 a Vawk suatte an nih thu leh kum 2021 ah Champhai District-ah Vawk suat a awm loh thu a sawi a. ASF thawhhnihna kum 2022, February ni 4 atanga finfiah hnuah July thla zawh thlengin Champhai District-ah Vawk 3765 an thih tawh thu leh 4182 te suat an nih thu a sawi a. Khua/veng 40 luhchilhin chhungkua 1069 te a nghawng thu a tarlang a. Vawk thi leh suat avanga sum hloh zat chu June 2022 thlengin cheng vaibelchhe 60 dawn a tlin thu a sawi bawk.
Bank loan rulh kawnga dan neihte Lead District Manager (LDM) Pu JM Soren chuan a sawifiah hnuah Vawk pul hrileng, African Swine Fever (ASF) avanga loan rulh kawnga Champhai District chhunga harsatna awmte leh hmalak theih dan turte zau zawka ngaihtuahho a ni a. ASF avanga bank loan lak rulh kawnga harsatnate neite tan ngaihhnathiamna awm theite tarlan niin, bank loan rulh hun chhung pawhsei, loan rulh chawlh lailawk bakah ran vulhtute dilna leh remchan dan anga loan kalhmang siam rem theih dan turte ngaihtuahho a ni a. ASF tihbuai loan la tu ten an harsatnate ziaka Branch Manager hnena an thlen theih dan tur leh hemi kawnga inzirtirna siam a nih theih nan Bank Branch-te chu kar khat chhunga ASF chungchanga hriat tur tulte leh hamthatna an hmuh theihte inzirtirna Financial Literacy Campaign buatsaih vek tura tih an ni a. Special DCC a thutlukna siamte hi SLBC lamah a tul anga ngaihtuah tura thlen tum a ni.
Special DCC thukhawmah hian Pu JM Soren, Lead District Manager chuan Annual Credit Plan (ACP), 2022-2023 chu pharhin a sawi zau a. Bank branch hrang hrangten sector hrang hranga an hmalak dan tur ruahmanna bitukte sawiho a nih hnuah pawm a ni a, Education sector hnuai loan pekchhuah kawngah mamawhte tan zau zawka inhawn a tul thu tarlan a ni bawk.
He hunah hian Pu Lalnunfela Chawngthu, SDO Sadar, Pi H.Lalhmachhuani, DDM NABARD, Line Department, Bank hrang hrang leh AMFU hotute an tel a ni.

Leave A Reply

This site uses Akismet to reduce spam. Learn how your comment data is processed.

This website uses cookies to improve your experience. We'll assume you're ok with this, but you can opt-out if you wish. Accept Read More