African Swine Fever leng thar leh avangin Champhai District chhungah Vawk 1000 an thi tawh a. Vawk Pul hri vang hian Khawzawl District-ah Vawk 139 an thi tawh bawk.
Vawk pul hri, African Swine Fever vangin nimin khan Champhai District-ah Vawk 51 thih belhin, Vawk 70 suat leh a ni a. Farkawn chu nimina vawk thi tamna ber niin Vawk 16 a thi a; Farkawn hi ASF tuarna ber niin kuminah Vawk 252 a thi tawh a ni.
AH&Vety Dept-a report lut chinah Zotlangah Vawk 115 an thi tawh bawk a. Ruantlang ah 95, Bethelah 94, Vengthar ah 86, Electric Vengah 72, Dilkawnah 54, Hmunhmeltha-ah 53, Zion Vengah 51, Dintharah 46, Kelkangah 21, New Champhaiah 18, Vengsang ah 16, Buangah 12, Melbukah 5, Kananah 4, Venglaiah, Zote leh Vengthlang North-ahte Vawk 2 theuh an thi tawh bawk.
ASF hri leng thar leh avang hian Champhai District chhungah Vawk 1000 an thi tling tawh a; Vawk 539 suat a ni tawh a. AH&Vety Dept chhinchhiah danin Nikum lama ASF avanga vawk thi nen Champhai District chhungah Vawk 1548 an thi tawh a; AH&Vety Dept-a report lut lo hi Vawk 100 chuang an thih tawh rin a ni. ASF hian Champhai District-a khua leh Veng 20 luhchilh tawhin, khua leh Veng 12 te chu ASF hri lenna hmunah puan mek a ni.
Hetihlai hian Vawk Pul hri vang hian Khawzawl District-ah Vawk 139 an thi tawh bawk. Vawk Pul hri, African Swine Fever vangin niminah Vawk 9 a thih belh leh a.
Khawzawl khawpui chhungah hian thla hlui April ni 10 atang khan ASF vanga Vawk thi hi awm tanin, nimin lamah tlai dar 3:00 thleng khan Vawk 9 a thih belh leh a; heti hian Khawzawlah hian Vawk 135 a thi tawh a ni. Khawzawl District chhunga ASF lenna dang Chawngtlai khuaah chuan nimin khan Vawk pakhat thih belh lehin heti hian Vawk 4 a thi ta a. Khawzawl District chhungah thla hlui ni 10 atanga nimin thleng khan Vawk 139 an thi tawh a, Khawzawl leh Chawngtlai tih loh Khawzawl District chhung khaw dangah ASF hri leng vanga Vawk thi Report a la awm lo thung.
Khawzawlah hian kar kalta khan ASF hri kai Vawk 20 suat a ni a, tunkarah erawh Vawk suat a awm rih lo a ni.
Comments are closed.